شكلها علقت معنا على الامتال المصرية: (هي المشرحة ناقصة قتلى) متلنا لليوم
بالحقيقة ما لحق حبر مقالنا السابق عن قانون الأحزاب ينشف كان طلع لنا قانون الانتخابات (ألعن وأدق رقبة)
وكل شي قلناه إمبارح عن قانون الأحزاب بينطبق مية بالمية على قانون الانتخابات (مع طلب الزيادة) ومشان اللي هي صعبة عليه منشرح له –وهي بيعرفوها اللي خدموا بالجيش السوري العتيد- أنه لما القائد المباشر بدوا يعاقب حدى من قطعته بعقوبة ما من ضمن صلاحياته بيعاقبوه بالعقوبة اللي ضمن صلاحياته –سجن 16 يوم مثلا- مع طلب الزيادة من الأركان للتشفي.. بس إذا كان المعاقب مدعوم او مظبط وضعه بتجي مع الرفض واحيانا بإلغاء العقوبة ليتخوزق قائد القطعة ويعرف حدوده بأنه يمحص قبل ما يصدر قرار (على أبو عماها)
بدكم تسألوني شو دخل هدا المثال بالموضوع؟
رح قول لكم: ذكاء سياسي اصطناعي.. اتعلمته اليوم من الدكتور في السياسة بسام ابو ع.. الله.. لما سألته غادة عويس عن اللي عم بيصر بكناكر فجاوبها عن اللي صار بجسر الشغور.. والله ذكرني بنكتة الطالب اللي راح على امتحان العلوم طلع له سؤال انه يكتب معلومات عن الأرانب وهو مو حافظ –ولا أبو حافظ- فجاوب أنه الأرانب هي من القوارض كالجرذان وراح كاتب كل شي عن الجرذان اللي حافظ ها بصم.. (بس هيك كأنه الجواب صار عن ليبيا ) طيب شلون بده يحلها د بسام ابو ع.. الله؟؟ بسيطة جدا!! قال: ومعروف أن الجرذان تنقل الجراثيم.. وراح سارد لنا كل شي عن الجراثيم بكل أنواعها وتوزعاتها.. استاذ!! أستاذ!!
ولاحظوا إني كمان طالب نجيب – مو طالب ابراهيم - لإنكم ملاحظين إني عم لف ودور وما حكيت شي عن قانون الانتخابات اللي هو موضوعنا اليوم
قلنا لكم: هي المشرحة ناقصة قتلى.. كمان هدا متل هداك ولد ميت وشبعان موت والجثة متفسخة ومتعفنة.. وريحتها عبت العالم كله من الشرق للغرب
يعني شلون حدى بده يقتنع انه في قانون انتخابات انولد والعملية السياسية كلها ماتت وتقطعت اشلاء تحت جنازير الدبابات اللي رايحة جاية كأنها بكزدورة.. ومين رح يدقق بعدد الدوائر الانتخابية والزنازين اللي عم تنفتح كل يوم ما بتنعد ولا بتنحصى.. والجنازات صارت يومية..
يعني برأيكم ممكن يكون الشهيد عم بيفكر شو بدهم يلبسوه أثناء الدفن!!؟
شي بيضحك!! ولا شي بيبكي!! ولا شو؟؟؟؟؟؟؟؟؟؟؟؟؟؟؟
ليست هناك تعليقات:
إرسال تعليق