سوبر حمار الحلقة الأولى

أهلا بكم في أولى حلقات برنامجنا سوبر حمار للحوار المسجلة من قناتكم قناة الفانية الفضائية (ف ف).. بعد ما استمعت لجنة التحكيم المؤلفة متل -ما بتعرفوا- من جحا (أ) وجحا (ب) وجحا (ج) للمتقديمين للمسابقة على اللقب على مدى تلات ايام في منتجع صحارى السياحي وبتعرفوا كل جحا على شو رح يعلق؟ إذا ما كنتوا قرأتوا الإعلان عن المسابقة اللي فيه التفاصيل بتقدروا تراجعوه على مدونة جحا الإلكترونية مقال 6/7/2011

بس يالله المعاملة مع الله رح نذكركم عالسريع أنه جحا (أ) يرح يعلق على الشكل جحا (ب) على الهندام جحا (ج) على الحركات.. وإنتو علقوا على اللي بدكم اياه والدرجات رح نقسمها بالنص بيني وبينكم على نفس حسبة حكومتنا الرشيدة بعد الاصلاح.. وهيك أنا بيطلع لي 90% لكل جحا 30 وإنتو إلكم 10% فجخوا بهالنعم.. ولا تقولوا جحا مانوه ديمقراطي.. ترى بزعل منكم وبتعرفوا إنه زعلي صعب.. بعدين من عدك بسعره ما ظلمك ما هيك

طيب خلونا بلا طول سيرة نبدى البرنامج بقى.. فرحبوا لي بالمتسابق الأول: (روقة الشرشوقة) وصفقة كبيرة لإله وخليه يقسم ويسمعنا

جحا (ج) الحركات	جحا (ب)  الهندام	جحا (أ) الشكل	اسم عضو اللجنة
2.5%	10%	%5	الدرجة
حركاته بليدة.. غير متناسبة مع الحكي.. ما فيه جميمية.. ما فيه ذكاء جسدي.. سوا لي تنويم مغناطيسي	لابس لبس غالي عالفاضي عادي.. تقليدي.. ما فيه ابداع.. ما فيه فن مافيه ذوق ولا..	شكله مدعوس على بوزه وخدوده ورقبته حمرا أكتر من اللازم ما منعرف ليش؟ يمكن مكتر ميكياج أو شو الغلط مو باين معنا الحكم لإلكم بالنهاية	تعليق العضو

نشكر اللجنة ونتمنى للمتسابق روقة الشرشوقة التوفيق يمكن اليوم ما كان على بعضه وصار عنده كم هنة معلش لكل حماركم كبوة.. معلش خلوا قلبكم كبير وصوتوا له حرام بيستاهل

المتسابق التاني: (حسيون ميمي سوفسف) صفقة ودبكة كبيرة لإله.. باين إله شعبية خلينا نشوف قرار اللجنة

جحا (ج) الحركات	جحا (ب)  الهندام	جحا (أ) الشكل	اسم عضو اللجنة
25%	5%	%2	الدرجة
حركاته مثيرة.. تهبل متناسبة مع كلامه بالأخص هزة راسه.. بعدين مسكته للمايكرفون غير شكل	لبسه أقل من عادي.. يعني وين الإبداع.. ونظارته من العصر الحجري.. يمكن تنفع بالمتحف الوطني	من سنتين مو حالق دقنو ولا مسرح شواربه كمان.. ولا منضف أدنيه من أيام أخوة التراب	تعليق العضو

نشكر اللجنة و المتسابق سوفسف ونتمنى له الحظ ينتقل للمرحلة التانية من سوبر حمار وان شا الله يلتقى شي ابن حلال يتبرع له بنظارة جديدة للمرحلة الجاية.. أو يعمله عملية ليزك على حسابه بركي بيصير يشوف اللي عم يصير قدامه احسن مو معتمد بس عالسمع.. على كل صوتوا له بيستاهل

المتسابق الثالث: (كيمو النائم) صفقة قوية كمان.. بيستاهل.. هات سمعنا لنشوف

جحا (ج) الحركات	جحا (ب)  الهندام	جحا (أ) الشكل	اسم عضو اللجنة
2%	2.5%	%1	الدرجة
ما فيه بنوب.. جمود كامل.. تشنج واضح.. ما عم  يتحرك فيه غير حواجبه	تقليدي.. ما فيه روح.. ألوان ممقتة.. حتى العلم اللي شاكه بقبته ميله بالغلط	شكله غير فني بالمرة.. شعره كل واحدة متخانقة مع التانية.. وفوق هدا بارم بوزه شبرين وعم يتطلع بالسقف متل القذافي	تعليق العضو

طيب هو متسابقنا النائم وضعه صعب حقيقة بس يمكن يكون بإيدكم إنقاذه ليتابع مشواره بسوبر حمار فصوتوا له بركي بتصر شي معجزة تنقذه

المتسابق الرابع:( دودي حبوش).. صفقتين إذا سمحتوا.. بيستاهل.. خليه يجود ويسمعنا مواله لنشوف رأي اللجنة

جحا (ج) الحركات	جحا (ب)  الهندام	جحا (أ) الشكل	اسم عضو اللجنة
10%	3%	%2	الدرجة
عنده شوية حركات معبرة بس كل حركاته عم تكون براسه.. يمكن لأكد أنه عنده راس أو لنبهنا لإنه في شي براسه (الله أعلم)	تقليدي.. ما فيه روح.. ألوان ممقتة.. لابس كرافة خطوط مستقيمة مع انه موضتها بطلت بس يمكن اختارها ليقول انه مستقيم	ما ملمع صلعته اليوم.. بعدين الحاجب اليمين أعلى منيح من اليسار وهدا بيدل عالمكر وبيقلل الهيبة ومضيق فتحة عينه وهدا مو إيجابي	تعليق العضو

حبوش منشكرك ومنشكر اللجنة ومنقولكم حبوش يمكن يكون إله مستقبل كبير لو دعمتوه ليكون سوبر حمار هذا الموسم.. فلا تبخلوا عليه بالتصويت.. ورح ننبهكم أنه التصويت بدا من هلق..

بعرف إنكم تعبتوا معنا اليوم.. رح نترككم.. بس استنوا مفاجآت الحلقات الجاية من برنامجكم سوبر حمار للحوار المنافسة فيها حتكون أقوى وأحمى.. تصبحو على خير

معد ومقدم البرنامج من صحارى

جحا الدمشقي