إجاني اليوم تهديد من الشبيحة، بإنهم إذا كمشوني رح يقصوا لساني متل ما ساووا شبيحة البحرين بالمؤذن اللي قصوا له لسانه (من لغليغو)
طيب والله هدا ظلم.. يعني أنا ما حكيت ولا كلمة ليقصوا لساني!!.. حدى منكم سمع مني شي كلمة بكل هالأزمة؟؟ حدى منكم سمع صوتي شي؟
الله وكيلكم ما فتحت تمي ولا لدكتور الاسنان حتى.. والله كله كتابة على الكمبيوتر والفيسبوك وتويتر.. فليش ليقصوا لساني طيب؟ إيه بالله هدا ظلم!!
يعني لو قصوا إيدي اليمين (لإنه أنا باكتب على الكمبيوتر بإيد واحدة) يعني ماشي.. شغلة فيها عدالة..وشغلة بسيطة إن شا الله.. يعني ممكن بسهولة درب إيدي اليسار عالكتابة ومشي حالي..
بس بركي قصوا لي الإدتين مع بعض؟!
إيه بسيطة.. فيه شب سوري عبقري مشلول اخترع نظام بيخليه يتعامل مع الكمبيوتر باللسان.. وبدون إيدين عم بيساوي برامج وأفلام كرتونية إلكترونية.. يعني دورة صغيرة عنده يمكن صير اكتب صوت وصورة وباللسان لحاله..
طيب بركي قصوا لي الإيدتين واللسان سوى؟!
كمان بسيطة.. شركة مايكروسوفت عم تطور نظام بيقدر يوصل بين المخ والكمبيوتر يعني بيصر ممكن الكمبيوتر يكتب لك العبارات اللي عم تفكر فيها بدون إيدين أو لسان..
طيب بركي قصوهم بعد الذبح الشرعي من الوريد للوريد متل ما ساووا مع إبراهيم قاشوش بحماة؟!
أظن كمان مو مشكلة أكيد كتير من الناس حتعيد نشر مقالات ونكات جحا على صفحاتها.. وأكيد رح يطلع لهم أكتر من واحد يكتب بنفس الاسم.. أو يطلع لهم غيره (جحا الحمصي.. جحا الحلبي.. وجحا الدرعاوي..)
بس المشكلة إذا – بعيد الشر- قصوا لي.. متل ما قصوا لحمزة الخطيب..
وليي.. وليي. ساعتها شو ساوي بحالي.. هي اللي ما إلها حل عندي
وترى بيعملوها هه.. ترى الشبيحة إيدهم واصلة.. بعدين صدق فيهم المتل (بقصوا أول بعدين بيعدوا).. والله أعلم على ما يوصلوا لي ويقصقصوني كم واحد رح يكونوا راحوا قصقصة بالشك
وعلى ذكر القص.. قال الشوحة بشينة ثعبان: ما بدها تقص شعرة معاوية بينها وبين الأمريكان.. بس بينها وبيننا مو بس قصت الشعرة.. إيه نتفت دقنا نتف.. حقيقة انها شبيحة درجة اولى
بصراحة أنا متشائم اليوم كتير، لإني إمبارح شفت بمنامي الدكتور يوسف الصيداوي، وكان عم يقول لي بنهرة: إنه كان عندي غلطة لغوية فظيعة بمقالي (سقف الوطن) لإنه كلمة اجتر ما بدها ألف مقصورى متل ما كتبتها وحط لي صفر بالعربي.. وهدا ترى نذير شؤم
فإذا وصلوا لي الشبيحة وقصقصوني.. أو ساويني كباب وكفتة.. فلا تبقوا تنسوني.. أو تقلبوا وتقولوا الحمد لله اللي خلصونا منه (يقطع عمره شو كان غليظ)
ليست هناك تعليقات:
إرسال تعليق