تعلن اللجنة المنظمة للبرنامج الشهير (سوبر حمار) الذي يبث على قناة جحا سات الفضائية: عن أسفها الشديد للخطأ الفادح غير المقصود الذي وقعت فيه في عملية اختيار ال (سوبر حمار) هذا العام ولذلك نكرر أسفنا ونبلغكم ببالغ الحزن والأسى أننا قررنا نزع اللقب من المتسابق الفائز (طابل برهوما) اللي تبين أنه كان مظبط الوضع بطريقة غير شرعية وتقرر منح لقب سوبر حمار 2011 للأستاذ (شريق شوحة) الذي تبين أن عدم قدرته على الحضور في موعد المسابقة لم يكن لظروف قاهرة بل بفعل فاعل مرفوع.. والقضية فيها تفاصيل كتير ومرتبطة بفضيحة ميردوخ.. والصحافة البريطانية واسكوتلنديارد.. بخيوط خفية ما كنا عارفين عنها شي.. وهدا طبعا جزء من المؤامرة المحبوكة على سورية.. اللي مشترك فيها كم متظاهر طيار أبو عشر دقايق ربع ساعة مقابل كم ألف دولار (بيني وبينكم إذا عرفتوا وين عم بيوزعوا خبروني هاه.. لا تشوفوني عامل مدونة.. ومدير قناة جحا سات.. الله وكيلكم كله مظاهر.. الله وكيلكم كحيان وطفران اكتر منكم..).. المهم عم بيقولوا انه ميردوخ امبراطور الإعلام هو اللي عم يدفع لهدول المندسين عن طريق قنوات عربية لتصور هالمظاهرات وتنفخ فيها.. وتعمل عليها قصص وسير لترتفع أسهم هالقنوات اللي هو إيه حصص فيها.. وكمان لتدمر اقتصاد البلد.. وتضرب الوحدة الوطنية.. وتضعف الروح المعنوية.. لإنه كل هدا الفيلم من تأليف وإخراج المخابرات الأجنبية.. وكل هدا وكتير من التفاصيل.. أكتر ما تتصوروا بكتير اللي كشفها بذكاءه وخبرته هو متسابقنا (شريق شوحة) وجاب كل الدلائل والبراهين قدام اللجنة.. وبما إنه نحن بعد ما تمخض عنه مؤتمر الخوار الوطني.. وبعد الاصلاح.. والخطابات الرئاسية التلاتة.. (وعلي الطلاق بالتلاتة) أنه ما عاد فيه عندنا كورجة.. وحك لي لحك لك.. وطعمي التم بتستحي.. وهي حق فنجان قهوة.. ولا طنش تعش تنتعش.. ولا بقى فيه دبرها استاذ..
لاء هلق انتو بسوريا جديدة.. انتو بعصر الديمقراطية والشفافية.. إيه شو مفكرين بريطانيا أحسن منا يعني هي الصحفي اللي طالع الفضيحة لاقوه مقتول والخيط انقطع.. وكل هاللجان والتحقيقات التانية ضحك على اللحى.. لازم يجوا يتعلموا الدروس من عنا بالديمقراطية والشفافية لإنه الأبجدية طلعت من عنا يعني كل شي من عنا أحسن من عندهم بس نحن أحيانا ما منقدر النعم اللي عايشين فيها.. ومشان هيك اللجنة تبعنا بكل شفافية استدعت المتسابقين وساويت بينهم مسابقة حاسمة وبناء عليه قررت أنه شريق شوحة هو الأحق بلقب سوبر حمار طبعا مع جائزة ترضية محرزة ل (طابل برهوما) عن قصته الفائزة بالمركز الثاني (البارجة الألمانية والمساعد جميل)
على أية حال لمزيد من التفاصيل بإمكانكم ترجعوا
مسابقات جحا 5/ 7 /2011
سوبر حمار الحلقة الاولى 14 / 7 / 2011
سوبر حمار الحلقة الثانية 17 / 7 / 2011
وذلك على مدونتي الإلكترونية www.juhadamas.blogspot.com
ليست هناك تعليقات:
إرسال تعليق