المجاهيل مرة أخرى

المجاهيل مرة أخرى 6/7 /2011

الشغلة كبرت وصار بدها حل!! ما في مجال يعني، معقولة نضل هيك؟؟ كل يوم عنا عشرات المجاهيل الجدد، ومئات من (قيدت ضد مجهول)

بدنا شي مجهول واحد يصير معلوم بركي بتنحل هالمعادلة المعصلجة.. إيه الله وكيلكم من كتر المجاهيل؟؟ والمتغيرات؟؟ والمتحولات؟؟ واللي ما معروف قرعة أبوهم مين؟؟ واللي ما معروف لهم طريق جرة؟؟

انطوشت..الله وكيلكم أنا كنت عم اطلب بالشفافية والديمقراطية.. هلق ما بدي من الله شي غير إني أعرف راسي من رجلي، والشيء بالشيء يذكر: بتعرفوا ليش المتظاهرين عم بيحطوا لثام على وجههم؟ قال لإنهم الوحيدين اللي عارفين راسهم من رجليهم بهالبلد.. نيالهم، يا ريتني كنت معهم، بس بصراحة خايف رجلي تورم بالفلقة، وترى أنا من أول دولاب بحكي كل شي..

خلونا بالموضوع، بركي منلاقي شي ابن حلال يساعدنا بمعرفة شوية من المجاهيل.. من أولها من المندسين للسلفيين والأمراء المفترضين.. للمسلحين.. للمخربين.. للمهجرين.. لما بعرف مين؟؟؟؟؟؟؟؟؟؟؟؟؟

طيب مين قتل الشهداء الألف وخمسمية؟؟!  ومين اعتقل المعتقلين؟؟! إذا ما في تظاهرات!! وما في حالة طوارئ!! ومين اللي هجر المهجرين؟؟! إذا الجيش راح يحميهم!! (الله يحرسه ويحميه، ولازم يضيفوا خرزة زرقة على العتاد الحربي مشان العين الحارة)

ومين المسلحين اللي تسللوا لتركيا وعم يمنعوا النازحين من الرجعة؟؟! ومين اللي عم يسرق البيوت بحمص ؟؟! ومين اللي عم يبيع ربطة الخبز متين ليرة بدرعا والمناطق المحاصرة؟؟! ومين اللي قتل إبراهيم  قاشوش بحما؟؟!

وشو صار بلجنة التحقيق اللي قالوا بدها كم يوم لتستوي، وصر لنا ناطرين شهور؟؟ وأهم شي وهالسؤال سألته أكتر من مرة، وينه عماد فوزي الشعيبي شو صاير فيه؟!!

طيب كل هاد بسيطة ويمكن بشوية بحث على غوغل يمكن نعرفه بس الشغلة اللي بتجنن حقيقة هي مظاهرات التأييد اللي عم تصير بأكتر من منطقة.. مين اللي عم يطلع فيها؟؟!! إذا إجاني أخبار من ميات وألوف من الكسوة وداريا ودوما والتل والجديدة.. والزبداني.. إدلب وبانياس.. وكلهم عم بيقولوا لي نفس الملاحظة: شفنا على التلفزيون السوري وتلفزيون الدنيا مسيرة تأييد للنظام بمنطقتنا بس ما قدرنا نعرف حدى من اللي بالمظاهرة، واللي ساووا معهم مقابلات ما عم نعرف لهجتهم!!! فمين هالمجاهيل؟؟! معقولة من كوكب تاني مثلا!!

ما بعرف والله، قلت لكم ما عدت عارف رأسي من رجلي، مع إني من الأول كنت عارف أنه الشغلة ملخبصة وفيها كتير مجاهيل بس ما كنت متوقع أبدا أنها تكبر لهالدرجة، وإذا بتتذكروا كنت كتبت بعد أول أسبوع  في 23 آذارعن المجاهيل وللأمانة رح نعيد نشره كما تم في حينه مشان اللي ما قرأه

ملاحظة مشان نص اليوم: الله يخليكم ديروا بالكم على المنعطفات، وانتبهوا لإشارات الاستفهام والتعجب لما يحصل اصطدامات خطرة

الثورة السورية والمجاهيل 23/3/2011

الثورة المصرية المجيدة بأيامها العشرين التي هزت العالم كان فيه مجهول واحد فقط، وهو (الراجل اللي واقف ورا عمر سليمان) وهو اللي طلعت عليه الأغاني والقصائد والكليبات اللي شفتوها وسمعتوها كلكم.

بس نحن لسى باليوم السابع من الحراك في سورية صار عندنا مجاهيل ما إلها عد ولا حصر!!

أول مجهول هو الضابط النمساوي اللي شغال عميل لأمريكا في القوات الدولية بسورية، واللي قالوا أنه هو اللي جند طل الملوحي للعمل مع المخابرات الأمريكية، لإنه مو بعيد يطلع إله دور في الأحداث الأخيرة لإنها صارت بدرعا، يعني قريب من مكان تواجد القوات الدولية العميلة..

بس مين هو هالضابط ؟؟ شو اسمه ؟؟؟ شو امتداداته ؟؟؟

لنعرف بركي إله علاقة بالموضوع!!

عندنا كمان الشاب المجهول اللي كان راكب الموتوسكل وطاير فيه واللي قالوا انه هو اللي بدا اطلاق النار على قوات الأمن و تسبب بهالأحداث الدموية كلها، لازم نعرف هو مين؟؟؟ وهو منين ؟؟؟

عندنا الشخص اللبناني اللي قالوا إنه هو اللي مول هالأحداث وحرض عليها.. مين هو يا ترى؟؟

كمان عندنا (ست الشام ) البنت الصبية اللي كانت لابسة جاكيت كحلي وإشارب أبيض عند الجامع الأموي، ولافة حالها بالعلم السوري وعم تهتف تحيا سورية حرة.. لازم نعرف مين هي؟؟؟

ولازم نعرف مين الشباب الزغرتية اللي مسكوها وجروها.. ونكسوا علمنا بالأرض ؟؟؟

والأهم من هيك إنه نعرف مين آباءهم ؟؟؟؟؟؟؟؟؟؟

لإنهم – على ذمتي – أولاد زنى، واتحداهم إذا كان حدى منهم بيقدر يعرف مين أبوه الحقيقي ؟!!

كمان ضروري نعرف المليون وستمائة ألف رسالة نصية قصيرة اللي قالوا إنها إجيت من برا سورية من جهات مجهولة يوم 18 آذار!!! ومين اللي بعتها ؟؟؟ ومين اللي استلمها ؟؟؟

وبدنا نعرف مين إخوات الشر.. اللي هجموا على المعتصمين في جامع العمرية في درعا ؟؟؟؟؟؟

يعني ما صار لنا أسبوع صار عندنا ملايين الأسئلة وإشارات الاستفهام والتعجب

لا تخافوا لسى رح نوصل للميليارات

  

جحا الدمشقي