بعد مقالي امبارح عن المنتجات اللي ممكن نصنعها ونصدرها بعد نجاح الثورة.. للأسف.. سمعت أنه شريف شحادة زعلان كتير كتير.. وقال شو يعني هو ما عمل شي مشان أنا طنشوه وما جيب سيرته، و كمان ما يطلع له شي من منتوجات الثورة باسمه!!! وعم بيقول هو ما صدق صار مشهور وصار إله اسم.. لإجي أنا هالأهبل وكمه هيك وطلعه من قائمة المشاهير والمهمين.. (إيه هي الله ما قالها)
بصراحة الزلمة كسر خاطري والله.. وإمبارح كل الليل وأنا عم أفكر شو بدنا نساوي فيه هاد؟!!
إيه بصراحة ما كان يطلع معي شي، إيه شو بدي ساوي له هاد؟؟ وهو طير النوم من عيوني للفجر.
بس سبحان الله جبار الخواطر.. صحيت الصبح على بالي فكرة حلوة بتناسبه تمام (حفر وتلزيق)
رح نساوي على شكل راسه حصالة فلوس (مكمورة).. ورح نكتب على صلعته عبارة (خبي قرشك الأبيض ليوم سقوط نظامك الأسود) بتطلع عجب.. شي نهفة
كمان والله في ناس عاتبوني مشان هي بسينة شعبان.. وسألوني : كمان حرام هي إذا منلاقي لها شغلة على قدها؟؟
تكرموا هي بسيطة رح نساوي على شكلها بسينة يعني بالشامي قطة متل لولوكاتي مثلا.. ولا تقولوا لي هي ما بتمشي والبضاعة بتلزق بخلقتنا.. لإنه الله بيجبر، وما حدى بيعرف شلون بيوزع الأرزاق.. ليكا هي اللعبة السمرا المكرعبة أخدت مسواق أكثر من باربي الشقرا ملكة الجمال !!
كمان دخيلكم لا تآخذوني، في كم واحد ناسي اسماءهم.. هيك طلع كل واحد منهم كم مرة.. يعني هدول ما يوصلوا ليكونوا أبواق.. هدول يعني زميرات.. صفيرات.. شي من هاد
بس كمان لا يخافوا.. هي الثورة تنجح والنظام يسقط.. و نحن مندبرهم.. نحن ما منسى حدى.. كله محفوظ.. وكله محفور بالقلب حفر
ليست هناك تعليقات:
إرسال تعليق