(الغريق بيتعلق بقشة) .. ياما ضحكني هدا المتل.. الصورة اللي فيه كتير كاركاتورية.. يعني تخيلوا إنسان قدو ودلقوا عم يحاول يتمسك بقشة.. مو هدا اللي بيضحك!! اللي بيضحك أنه يكون متخيل ان هالقشة ممكن تنقذه بأخر لحظة!! بحياتي ما تخيلت انه ممكن حدى يعملها!! وتصورت انها حالة خيالية من باب الكناية مو اكتر.
بس ما بخبي عليكم اليوم غيرت رأيي، والسبب النظام السوري!! شلون يا حزركم؟؟
يعني باصراره على رواية انه السفير الأمريكي تسلل خلسة لحماة، وإنه هو اللي حرض المتظاهرين.. وإنه هدا دليل قاطع انه الأمريكان هم اللي ورا هالأحداث من أولها لتاليها.. وكل العلاك المصدي اللي لتوا وعجنوا فيه بالأيام الماضية.. ما بعرف ليش ذكرني بهالمتل والصورة الكاركاتورية اللي فيه.. واللي يمكن أنها هون أكتر كاركاتورية.. يعني تخيلوا نظام بقدو دلقوا وجيشه وأمنه وشبيحته.. واعلامه وكتابه وأزلامه.. وكل واحد متمسك بالتاني لما يغرق وكلهم متمسكين بقشة.. أكيد شي بيضحك!!
يعني هو صحيح ما في حدى بالعالم كله غير أزلام النظام بسورية ولبنان قادرين يصدقوا هالرواية المفشكلة.. ولو إني متأكد مية بالمية بأنه ما حدى منهم مصدق أو مقتنع داخليا، لإنه الحبكة مهلهلة ومفضوحة أكتر من اللازم!!
والغريب فعلا إنه رغم إنه الدراما السورية ساوت قفزات نوعية بالسنوات الماضية بكل المجالات.. وتمثلياتهم نجحت واقنعت الناس، فليش النظام ما قدر يستفيد منها ومن كوادرها؟؟ وليش كل تمثلياته عم تكون فاشلة، وما عم تقنع حدى؟! ونصوصها رديئة وإخراجها مهلهل.. من تمثلية المسلحين اللي قاعدين بين شجر الزيتون بدرعا.. لتمثلية الموتوسكل الغامض اللي قالوا انه سبب احداث إطلاق النار الأول وبعدين اختفى فجأة وكأنه فص ملح وما منعرف إمتى المخرج بدو يرجعوا للمسلسل متل ما رجع أبو عصام ليشارك بمؤتمر الخوار الوطني بعد ما كان ميت تلات أجزاء.. ولا تنسوا مسرحية سفيرتنا بباريس.. وفيلم الفنتازيا التاريخية (الإمارة السلفية في بانياس).. وفيلم الأكشن (العلم الإسرائيلي في حمص).. وفيلم الرعب (دماء فوق جسر الشغور) وآخرها فيلم الخيال العلمي (السفير الأمريكي في حماة) ولسى في سناريوهات كتير جاية.. حضروا حالكم للإثارة
حقيقة الغريق بيتعلق بقشة
ليست هناك تعليقات:
إرسال تعليق