يعلن جحا الدمشقي عن بدأ التسجيل في المسابقة الكبرى لبرنامج (سوبر حمار) وهو أهم برنامج في تاريخ القنوات الفضائية العربية لاكتشاف المواهب في الحوار الوطني تحت سقف الزري.. الوطن (عفوا)
فعلى من يجد في نفسه الموهبة والكفاءة لذلك أن يرسل رسالة قصيرة فيها حرف السين بالعربي أو الإنكليزي، أو يرسل إميل فارغ إلى موقع جحا.. وأن يرقص ويستعد للمقابلة الأولى يوم 10 تموز الحالي في مكان يحدد لاحقا للمقبولين فقط.
ولأن جحا رجل ديمقراطي –مو متل الحكومات العربية- فسوف يكون التقييم بنسبة 90% للجنة الفاحصة (مو 99.9 %) وسيكون نصيب الجمهور 10% فصوتوا بكثافة لمرشحكم المفضل، ونذكر بأن التصويت مهمة وطنية مقدسة (فلا حدى يتهرب ويقول ما معي رصيد.. أو خبي قرشك..) وترى الموضوع بيستاهل أنه نكتشف نجوم الضه.. قصدي نجوم الوطن.
ولأنه جحا رجل بيتمتع بمصداقية وشفافية عالية فرح نكشف لكم تشكيلة اللجنة وطريقة عملها، لحتى كل شي يكون على البساط الأحمدي مو على بلاطة (متل ما بيقولوا اخواننا اللي سبقونا)
تشكل لجنة التحكيم من السادة التالية اسماؤهم:
جحا (أ)
جحا (ب)
جحا (ج)
وسوف يكون عمل اللجنة على النحو التالي:
جحا (ج) | جحا (ب) | جحا (أ) | اسم العضو (بلا معنى) |
تقييم الحركات الجسدية وتعابير الوجه (باراسكيولوجيا) | تقييم الهندام (الستايل) | تقييم الشكل (الموديل) | المهمة تبع العضو |
30 % | 30 % | 30 % | النسبة المئوية |
طيب يا عمو جحا: ما في شي من التقييم للصوت؟؟؟!
لك ضحكتوني والله يا ولاد، وأنا نادرا ما إضحك.. إيه لوش بشار الأسد ما بضحك..
أكيد اللي متوقع أنه صوته يكون أعلى من زئير الأس.. قصدي الرصاص.. وهدير الدبابات.. أكيد هدا بيكون سوبر.. سوبر حمار (دبل) مع امتياز ومرتبة الشرف كمان.. هدا ناجح دغري من دون لجنة.. ما في داعي يجي..
والباقي منلتقي يوم 10 تموز ان شا الله لا تنسو.. وإيه فشر ستار أكاديمي.. وخليك بالبيت تبع يوم الخميس( اللي ما بعرف مين عاملو).. وفشر سوبر ستار وأخواته.. إيه رح نكسحهم كسح كلهم ببرنامجنا اللي رح تصير سيرته على كل لسان..
لا تنسوا الموعد وبرنامجنا المميز (سوبر حمار)
الله يخزي الشيطان نحن نسينا نقول لكم أنه الشركات الراعية لبرنامجنا هي: مخلوف للأعلاف النباتية.. شاليش لتنمية الثروة الحيوانية الوطنية.. حمشو للمواشي.. مع تحيات المسلخ الوطني.. ونقابة البياطرة
ليست هناك تعليقات:
إرسال تعليق