نكات الشبيحة

مقدمة

زمان لمان حدى بدو من التاني شغلة وحاسس إنها صعبة شوية.. كان يعمل له مقدمة: (إلك والا للديب).. هلق صار بيقول له: إلك والا للشبيحة

نكتة تشبيحية 1  (كبار الشبيحة)

مرة بشار وماهر طالعين من سهرة عامرة أخر الليل.. ماهر قال لبشار: دوس فرام رح تفوتنا بالحيط.. جاوبه بعصبية: إنت اللي سايق هلق.. دوس فرام بسرعة.. دوس..

قال له: ما بعرف ليكون آصف

نكتة تشبيحية 2  (الشبيح المالي)

عندما قرر الشبيح رامي مخلوف التبرع بأملاكه لأعمال البر والخير..

سأله أحد الصحفيين: ماذا ترك لأهلك يا أبا الريم؟؟؟

قال له: الله.. سورية.. بشار وبس

نكتة تشبيحية 3

واحد من الشبيحة وشم على إيدوه نجمة سداسية زرقا

واحد من العواينية طق له برغي دغري

استدعاه المعلم تبعه، وقال له: ليش هيك راسم على إيدك ولاه؟؟

قال له: سيدي هي خطة.. مشان إذا الإسرائليين هجموا علينا باندس بينهم بيفكروني منهم.. بعدين بشركهم..

قال له: ولك يا حمار.. وإذا نحن هجمنا عليهم !!!

جاوبه: إيه بقص إيدي.. من هون

نكتة تشبيحية 4

حاجز مشترك للأمن مع الشبيحة وقفوا شبيب حمصي

سأله زعيمهم بلهجة عنجهية: انت مندس شي؟

جاوبوا بسرعة: مندس نصير

نكتة تشبيحية 5

مجموعة من الشبيحة كمشوا كم واحد من المندسين وقعدوا يعذبوهم ويمرمطوا فيهم الأرض

واحد من المندسين قال لهم: حرام عليكم أنا معي ماجستير

رد عليه زعيم الشبيحة: ان شا الله يكون معك الكوليرا ما رح نعفيك

نكتة تشبيحية 6      
واحد شبيح قرر يتوب.. ولإنه قراراته سريعة دغري قام يصلي حتى بدون وضو
هو وعم يصلي وقفت قدامه قطة
راح شايط القطة برجله من كل عزمه
لما خلص رفيقه قال له: ليش هيك ضربت البسينة مو حرام عليك؟
جاوبه: أنا لما كون عم صلي (الله ما بعرفه)

نكتة  تشبيحية 7

زعيم الشبيحة حس بالملل فسأل جماعته واحد واحد مين بيعرف يلعب شطرنج؟ ما لاقى حدى

قلهم: كلكم هبلان.. روحوا شوفوا لي حدى من المعتقلين اللي عندكم يكون بيعرف يلعب شطرنج جاي على بالي ألعب دق حامي يشغل المخ.. يرح يصدي من قلة التشغيل

راحوا غطوا لهم نص ساعة.. إجوا بعدها شاحطين واحد شحط

لما شافهم هيك صرخ فيهم: اتركوه يا حيوانات..

سأله بصوت مهذب: حبيب بتعرف تلعب شطرنج منيح؟

جاوبه: طبعا بعرف

قال له: بتلاعبني

قال له: إذا بدك نلعب.. بدنا نشلح الرتب.. والشغلة ما بدها زعل وتعصيب

قاله له: لاه يا زلمة.. عيب.. نحن بعد الحوار الوطني صرنا ديمقراطين.. وروحنا رياضية كمان

قال له: طيب خليهم يفكوني طيب

صرخ فيه: فكوه بسرعة يا كلاب.. وجيبوا لي الشطرنج بسرعة

بدوا لعب.. وبعد شوية المعتقل قال له: هي قتلت لك جندي.. وهي جندي.. هي قتلت لك الحصان.. هي قتلت لك الفيل..

قاله الشبيح: أنا رايح شوية عندي مكالمة عائلية ضرورية.. لا تحرك شي

غاب شي خمس دقائق واجى.. قال له: اصحى تكون حركت شي

قال له: لا والله.. بس هي طيرت لك القلعة

قال له: وأنا حرقت لك البيت والسيارة

نكتة تشبيحية 8

الشبيحة وقفوا شبيب حمصي ابو 13- 14 سنة.. قالوا له: اكيد انك كنت بالمظاهرة مو هيك؟؟

قال لهم: لاء كنت عم اتمشى بالدبلان

فقعدوا يتمسخروا عليه، وقالوا له بدك تغني لنا غنية او موال لنشوف صوتك مبحوح ولا لاء؟؟

رد عليهم حاضر بغني لكم.. بس إذا بدي أنا غني.. إنتو بدكم تدبكوا.. بتعرفوا ولا شو؟؟

قالوا له: عيب إنت اطلع وشوف

قال لهم: يالله حطوا السلاح ونزلوا على الساحة إيد بإيد لشوف.. وغنى لهم وصلة (يا درعا نحن معاك للموت.. يا حماة نحن معاك للموت..) والشباب نازلين دبك

ولما خلص قالوا له: الله معك.. صوتك ما إشبوه شي

نكتة تشبيحية 9

واحد شبيح اتزوج وحدة شبيحة

جابوا بنت !!!

شو سموها؟؟؟

...............

...............

...............

فتنة....طائفية

نكتة تشبيحية 10

اربعة شبيحة أخوة سطو على بيت قديم وسرقوا كل الاغراض اللي فيه

قعدوا يقسموا الاغراض لاقوا مصباح عتيق اول ما لمسه طلع لهم المارد

قال لهم: كل واحد منكم بيطلع له امنية وحدة نفذ له اياها شو ما كانت

الأربعة تشاوروا.. واتفقوا كل واحد يطلب طلب للأربعة وبعدين يقسموا

الأول: طلب من المارد يبني له اربع قصور من قصور الف ليلة وليلة

قالوا المارد: صار.. خلال عشر دقايق بيكونوا جاهزين على كيفك

الثاني: طلب منه مية سبيكة دهب واربعين مليون دولار..قال له: صار

الثالث: طلب يجيب له اربع نسوان كل واحدة متل القمر.. قاله: صار

الرابع قال للمارد: بدي ترجع لي الوضع لما كان عليه قبل 15 آذار

المارد بثواني دمر القصور واخفى الدهب والمصاري والنسوان

الأربعة هاجوا على المارد.. وقالوا له: شو ساويت!!؟

قال لهم: والله هدا الشي الوحيد اللي بقدر رجعوا لما قبل 15 اذار

نكتة تشبيحية 11

مجموعة من الشبيحة كمشوا مجموعة من المندسين وقعدوا يعذبوهم ويمرمطوا فيهم الأرض

واحد منهم – يظهر انه طبيب - قال لهم: حرام عليكم أنا معي بورد أمريكي

قال له: زعيمهم: يكون معك حصبة ألمانية ولا حمة مالطية.. ما رح نعفيك

نكتة تشبيحية 12

واحد من الشبيحة من كم شهر اجى يتمسخر على ختيارة حورانية.. قال لها: شو يا حجة لسى بدكم حرية!!

قالت له: لاء..أعوذ بالله... بدنا إسقاط النظام

من كم يوم شبيح تاني إجى يتمسخر على ختيارة حمصية.. قال لها: لسى بدكم إسقاط النظام!!!

قالت له: لاء يا ماما... بدنا محاكمة النظام

نكتة تشبيحية 13

واحد شبيح شاف أبوه بنومه.. قال له: ما كنت على طول تقول لي: بحياتك ما بتصير بني آدم

هي شوفني صرت قائد مجموعة

قال  له: بس بحياتك ما رح تصير بني آدم

نكتة تشبيحية 14

الشبيحة مرض واحد منهم واصفر ووقع مغمى عليه.. ركدوا فيه لعند اقرب دكتور لاقوه..

فحصه الدكتور وهمة محاوطينه.. كتب لهم دوا.. وقالهم بتخضوا منيح بعدين بتعطوا اياه..

بعد شوية راجعين بدهم يقتلوا الدكتور.. وصرخوا فيه: مات ونحن عم نخضوا لسى

نكتة تشبيحية 15

الحماصنة كتبوا على حمار –اجلكم الله – بشار الأسد وفلته بالشوارع

زعيم الشبيحة عرف بالموضوع.. قال لجماعته: معك ساعتين بالضبط إذا ما بتجيبوا لي هالحمار لحطكم بزريبة متل الحمير.. فاهمين

راحوا الشبيحة ركيد.. كل ما شافوا حمصي يسألوه: شفت لنا شي حمار؟؟

يرد عليهم: اللي مكتوب عليه بشار الأسد؟؟

يقولوا له: إيه.. يقول لهم: راح هيك..

التاني يقول لهم: بالاتجاه المعاكس..

قضوا لهم ساعة ونص ركيد انقطع نفسهم.. أذكى واحد فيهم اقترح يروحوا على سوق الحمير يجيبوا أي حمار ويكتبوا عليه بشار الأسد وياخدوه للمعلم تبعهم.. والكل وافق ونفذوا الخطة عالسريع

صاروا كل ما مروا من جنب حمصي يقول: نحن بحمار واحد ما كنا مخلصين

للأمانة الأدبية نقول: أن بعضها منقول بتصرف ونرجو من كل من لديه نكتة اخرى عن الشبيحة ان يضيفها كتعليق او يرسلها الى بريد جحا الدمشقي الالكتروني juhadamas@gmail.com