فيه شغلات حقيقة بتحط العقل بالكف!! متل شو؟ بدكم تسألوني أكيد!!
متل عقارب الساعة مثلا، فمع أنه عقارب الساعة بتمشي عكس كل شي بالكون، فمن ظلم الإنسان بيضل يقول عن الكل أنهم بيدوروا عكس عقارب الساعة –يمكن لإنها الشي اللي هو اخترعه- وهيك بنقول : الأرض بتدور حول الشمس عكس عقارب الساعة والقمر حول الأرض عكس عقارب الساعة.. حتى الإلكترون بيدور حول نواة الذرة عكس عقارب الساعة.. وكل شي بالكون بيدور بشكل طبيعي( بقدرة رب العالمين) الساعة –اللي اخترعنها- بتدور عكسه، بس متل ما إنتو شايفين قلب الحقيقة ما بكلف الإنسان شي، وبكل بساطة بيقدر يقول عن كل شي لوحده انه بيدور عكس ساعته حتى لو كان مجموعهم الكون كله.
طبعا كل هالمقدمة مشان قول لكم أنه عقلي صار بكفي من ورا البورصة السورية!! لإنه كل بورصات العالم وقت بيكون فيه أزمة داخلية أو اقليمية أو عالمية بتبدى تنخفض أو على الأقل بتبدى تذبذب كم يوم ارتفاع كم يوم انخفاض حسب الأخبار.. أو حسب سلوك المستثمرين وردات فعلهم.. ومعظم الأوقات بتكون بفترة الأزمات وبحكم غريزة الخوف الطبيعي اللي بتخلي الاتجاه الغالب هو الانخفاض والتقلص والارتفاع بيكون الاستثناء ببعض أيام
بس بما إنه كل بورصات الكون بتدور عكس عقارب البورصة السورية اللي معظم إذا ما كل الأيام –حسب وكالة سانا- عم ترتفع كم نقطة وحجم التداول أعلى من المعدل..
يعني الشغلة واضحة متل عين الشمس، فليش الست كلينتون عم تقول: أنه اللي عم بيصير بسورية بيحير!!
سلامة قلبها من الحيرة، بس لو أعرف شو اللي محيرها بالضبط ؟؟ كنا ريحينا لها قلبها.. ما بعرف والله إذا كان السؤال اللي محيرها هو (هل رح يسقط النظام بسورية ولا لاء ؟؟)
يا ست كلينتون –الله يهديك- هي شغلة ما بدها حيرة.. ولا فتح الفال.. ولا ضرب مندل!!
النظام سقط.. بس في فرق توقيت كم ساعة بيننا وبينكم ولما يوصلكم الضو وتصير ساعتكم على ساعتنا بتعرفوا
الشغلة ما بدها حيرة وضرب أخماس بأسداس خانم.. كل الموضوع –اللي محيرك ومحير العالم كله- انه سورية هلق عم بتدور عكس عقارب الساعة.. يعني متل أي شي طبيعي بهالكون
لاحظت اليوم أيضا أن دبابات النظام تدور فوق خريطة سورية بنفس اتجاه عقارب الساعة.. يعني عكس الطبيعي
ردحذف