أنا مستغرب ليش الناس مستغربة أنه النظام لسى عم يرتكب جرائم واعتقالات وانتهاكات بعد ما وقع على البرتوكول!!!؟
ليش من إمتى نظام حافظ الاسد احترم اي توقيع؟؟!!
ليش ما بتعرفوا أنه نظام حافظ من زمان موقع على كل الاتفاقيات الخاصة بحقوق الإنسان!!! من العهد الدولي الخاص بحقوق الإنسان الأساسية.. لإتفاقيات جنيف بكل ملاحقها.. حتى اتفاقية حماية حقوق المرأة.. والاتفاقية الخاصة بحقوق الأطفال.. وكمان موقع على ميثاق انشاء محكمة العدل الدولية والنظام الأساسي لمجلس حقوق الإنسان.. وكان قبل الأزمة مقدم عالعضوية فيه..
يعني من حيث التواقيع نظام حافظ أحسن بكتير من أمريكا نفسها اللي لسى ما وقعت على كتير من هالاتفاقيات..
طيب قيمنا من هالاتفاقات اللي ما إلها طعمة، هي ممكن نقول وقعوا عليها هيك للمجاملات الدولية والعلاقات العامة.. خجل، محاياة، اضطرار.. أي شي
خلينا بالدستور اللي جابه حافظ نفسه وطج لنا إياه بوجهنا وطج حفرنا عليه كمان باستفتاء شعبي (مو مزور) بوقتها
طيب شو طبقوا منه؟؟!! في شي غير المادة 8 تبع الحزب القائد.. وحتى هي طبقوها بشكل مجزوء ومشوه.. ومتناقض مع باقي الدستور اللي بيقر بالمساواة بين المواطنين وعدم التميز
فشو بدنا نقول عن المادة( 11) والمادة (12) !! وهي اللي بتقول الدولة ومؤسساتها في خدمة الشعب ومهمتها الحفاظ على حقوق المواطنين الأساسية.. وتحدد مهمة القوات المسلحة بالحفاظ على سلامة أراضي الوطن وضمان أمنه..
والمواد من (25 ألى 40 ) اللي بتكفل الحريات الأساسية اللي ما طبق منها شي.. ولا كلمة ولو الغلط (وكأنه أكلها الحمار من يوم كتابتها)
فشو الجديد يعني؟!! ومن المستغرب؟؟ وليش يا بعدي؟!
يعني منعرف تمام أنه هدا كله كان ومازال بالنسبة للنظام حبر على ورق.. بس بالنسبة إلنا نحن الشعب السوري صارت دم على الأرض.. والدم ما بيصير مية
ليست هناك تعليقات:
إرسال تعليق