الأساطير المؤسسة للعقل العربي 3

"جساس السلاح أسهل الحلول"

لو ما كانت القلوب مليانة والأمور واصلة لأخر حد، لكانت حادثة قتل ناقة البسوس مرت بدون تعقيد، مهما ندبت وانبحتت "العجوز الشمطاء" وقالت الأشعار.. ويمكن كان أكبر شي ممكن يصير أنه يقبلوا بدية "تعويض" أو يشتروا لها كم ناقة بدلها، أو..

بس أنه يصير كل هدا التهيج والتحريض خلال أيام على هالناقة اللي حلبت دم ما إله أول من أخر!

أكيد الموضوع كان أكبر من ناقة! وما بعرف اذا كان ممكن يكون أقل من حرب سبعين سنة!

المهم بلا طول سيرة، أنه جساس اللي كان فارس قبيلة بكر ونتيجة التحريض اللي صار اختار يكون بادي المواجهة متل ما كانت عمته البسوس بادية التحدي للسلطة وخسرت خلالها كل ما تملك في الدنيا "ناقة الدم"

وما بعرف إذا كان معقول أنه تروح الأمور للمواجهة المسلحة بين جساس وصهره -زوج أخته- كليب!!

بس حسب "ما وراء الخبر" في الجزيرة، أنه جساس كان موتور.. ودافن حقد عميق على ابن عمومته وصهره كليب من يوم ما اختارته القبائل ليكون ملك عليهم لما يتمتع به من شهامة وفروسية وكرم.. وما حدى اعطى صوته لجساس او جاب سيرته حتى!.. ومن يومها كان ناطر لحظة مناسبة يقدر فيها ينقض عليه.. وأنه هو اللي دفش عمته البسوس لترعى ناقتها بمرعى كليب ليستفزه، ويوقعه بالغلط..

وحسب ما جاء في حصاد اليوم: أن جساس الشرير لأنه ما كان قد مواجهة كليب لطى له في مكان مخفي واستناه لما مرق وقذفه بسهم مسموم في الظهر بكل حقد ولؤم بدون أي كلمة، وهرب بعد ما أتأكد أنه مات..

وعلى قولهم انه الشغلة واضحة وأنه جساس الشرير تبع الفيلم وباينة من اسمه "على أساس اسم كليب أنظم يعني!"

أما برنامج بانوراما عالعربية كان تحليلهم: أنه لما شاف جساس التهيج والغضب اللي صار بقبيلته لما عُقرت الناقة.. وأحس أنه الأمور ما جاية على خير.. فركب فرسه وراح يقابل صهره كليب ليطلب منه أنه يساوي شي يهدي فيه الخواطر ويمتص الغضب.. يعني مثلا يقدم اعتذار رسمي.. أو يبعت له وفد..

بس كليب الملك الجبار المتعنت.. اللي ما بيسمع النصيحة، رفض حتى مجرد أنه يقابله أو يسمع منه، ودار ضهره إله ومشي باستهزاء مهين.. ورفض كل مناشدات جساس أنه يلتفت إله ويسمع منه.. بالآخر لما يئس منه.. طلب منه أنه يبارزه وجه لوجه متل الرجال، بس كليب ضحك باستهزاء وضل ماشي

وحسب ما جاء في "آخر ساعة" أنه جساس انفعل وضرب الدم براسه وشد النبل لآخره وهو عم يترجى كليب أنه يستجيب لمطالب الناس بلا فائدة، وفجأة طلع السهم بالغلط وبلحظة وقع كليب عن حصانه وطب ساكت، وجساس وقف مذهول أمام الجثة وضل ساعات عم يبكي فوقها وهو مو مصدق أنه رمّل أخته ويتم أولادها.. بعدين توارى عن الأنظار وهو خجلان من حاله..

على كل نقوا لكم شي رواية من الروايتين لبين ما نرجع بالحلقة الجاية

يتبع