الأساطير المؤسسة للعقل العربي " 1 "

مقدمة

بيجوز يعتقد البعض انه الاساطير هي مجرد حكايات بتنقال بالمقاهي والسهرات.. او هي مجرد خيال.. او ماضي سحيق، ما عاد إله أثر

بس لما بيكون فيه بعض الأساطير بتكرر بشكل متواتر بخطها العام بس مع تغير باللباس والاسماء والتفاصيل.. بتكون حاكمة للعقل الجماعي للمجتمع بدون ما نشعر..

من اهم هالأساطير هي سيرة المهلهل ابو ليلى اللي سردت عبر تاريخنا مئات آلاف المرات بأشكل متعددة.. والاسم لحاله لغز، ليش تم هدا التحوير لأنه الحقيقة أنها سيرة حرب "البسوس"، اللي لازم نبحث عن جذورها لنشوف إذا إلها فروع في حاضرنا، وإلا هي مجرد اسطورة فعلا بتنحكى للتسلية بالليالي الخالية

 

"كليب والتجربة الانبهارية"

قال الراوي يا سادة يا كرام "بعد الفطار والذي منه.."  أنه كليب كان شيخ  "أهله وعشيرته" وكان متل كل شيوخ العشاير بهداك الوقت اللي عايشة بصحراء العرب وكانت إله سلطة وكلمته مسموعة..

بس كليب بيوم من الأيام صار له رحلة إلى بلاد اليمن "اللي كان سعيد" وبهي الرحلة شاف شي بحياته ما شافه.. فالرجال انبهر بالاشياء اللي شافها عند سعداء اليمن.. وبعملية ضرب أخماس بأسداس بسيطة خلال أيام.. طلع معه أنه ممكن ينسخ التجربة اليمنية السعيدة إلى مضارب قبيلته التعيسة!

وأهم شي من نسخة كليب كان أنه يتحول من شيخ عشيرة إلى ملك "يملك ويحكم" طبعا

وفيما يبدو لي "حسب تحليلي الشخصي" أنه الجماهير الكادحة بوقتها بالقبائل اللي كانت عايشة بهديك المنطقة اقتنعوا او استسلموا لحلم كليب بأنه لو قبلوا فيه ملك رح يصيروا متل سعداء اليمن إذا مو أسعد كمان!!

وهيك يا سادة يا كرام أخد كليب الشرعية و صار ملك على الرعية.. ولف الزمن ودار.. وهالحلم السعيد لا كان ولا صار.. إلا بالقصائد والأشعار "لإنو بوقتها ما كان فيه نشرات أخبار" ومسكين هالملك ما كان عنده قناة الجزيرة ولا الدنيا.. ولا "صوت الصحراء" حتى!  كلهم كم شاعر وكم ربابة ومع هيك قدروا يخلوا سيرته عايشة الف خمس مية سنة!

بس مو هون بيت القصيد، بيت القصيد انه الناس بعد هالزمن حسوا أنه ما فيه شي اتغير بحياتهم للأحسن، وبالعكس تماما، لأنه ملك البدو أولا ما قدر يطلع من جلده "قصدي من فكرة الانتماء القبلي" وضل عم يتصرف أنه ابن قبيلة تغلب بكل تبعاتها بدون ما يستوعب أنه صار من المفروض أنه ملك لكل القبائل اللي قبلت فيه، وبدون ما يستوعب أنه الشرعية اللي أخدها أصلا هي شرعية الحلم اللي طرحه، ومو شرعية أنه قبيلته هي الأقوى والأكتر عددا وعدة بين القبائل اللي صارت خاضعة لنفوذه  وسلطته وبس

وبطبيعة الحال متل اي نظام - بالماضي او الحاضر او المستقبل- بيحتكر السلطة رح يحتكر الثروة كمان، صحيح الأعراب بهداك الزمان ما كان عندهم شي يذكر "كم شاة وكم ناقة.. وصلى الله وبارك.." مع هيك صار احتكار اهم ثروة! فبيوم من الأيام الملك كليب أصدر فرمان "شفهي أكيد" باحتكار أحسن مرعى في المنطقة.. ومنع أي حدى يرعى فيها غير نياقه الملكية المدللة..

طبعا شو تبريره لهدا القرار؟! مو متذكر والله، أو أنه الروايات مشوشة بشأنها "يعني معظم الرواة اعتبروها شغلة عرضية تافهة بالقصة كلها!!!"  بس أظن أنه في كتير تبريرات عبر التاريخ لهيك قرار.. بإمكانكم تختاروا شي واحد منها من هون ليصير وقت الحلقة التالية

يتبع