اصدر بشار اليوم عفوا – والعفو منكم – عن بعض الجرائم أهمها الفرار الداخلي أو الخارجي من الخدمة الالزامية وهدا شي مفهوم وهدا بيأكد أنه في عدد كبير من الفارين من الخدمة والمتخلفين عنها (هدول طبعا غير المنشقين) وهدا صار مساوي أزمة كبيرة للنظام..
كمان شمل العفو موضوع حيازة الأسلحة والذخائر غير المرخصة.. وهدا كمان مفهوم
وشمل كامل العقوبة عن مخالفة المرسوم 54 الصادر في 21- 4 – 2011 اللي هو قانون تنظيم التظاهر اللي ما حدى رد عليه من يوم ما طلع، لا المنحبكجية ولا الثوار.. هدول مرقوا من تحته.. وهدول مرقوا من فوقه.. وضل متل الزائدة الدودية الملتهبة اللي ما إلها إلا الاستئصال
وشمل كمان العفو الكامل –العفو منكم مرة تانية- عن الجرائم الضاحكة (أنا هيك مسميها، بعدين إنتو احكموا) ومنها على سبيل المثال : إضعاف الشعور القومي للأمة (لا تضحكوا هي مو نكتة هي جريمة منصوص عنها بالمادة 285 من قانون العقوبات السوري)
أنا بس بدي إفهم شلون ضعفوا لنا هالشعور هدول المجرمين؟!! والأهم من هيك انه نعرف يعني، هل ارتفع شعورنا القومي ورجع لوضعه الطبيعي لما حبسنا هدول المجرمين المفترية؟!!.. طيب وهلق شو بدو يصير بشعورنا القومي بعد ما طالعهم بشار اليوم بدون ما يشاورنا أول؟؟ ترى انا بحمله كامل المسؤولية عن اي شي بيصير لشعورنا القومي من اليوم ليوم الدين.. ترى الشغلة مو لعبة اليوم حبسناهم واليوم طلعناهم الشغلة فيها الشعووور القومي بحاله!!!
وعندك من هالمقياس وقيس بالمواد من 285- 339 فعندك النيل من هيبة الدولة (بعد قلبي شو مهيوبة).. وعندك إيهان نفسية الأمة.. (دخيلكم كل شي إلا نفسية الأمة.. حاكم كتير حساسة).. وعندك إثارة النعرات الطائفية والعنصرية..(وليي ..وليي.. هي الشغلة ناقصة..) وعندكم كمان إعاقة السلطات الشرعية من تنفيذ مهامها.. ونشر أخبار تثير القلق العام..
بالله عليكم اللي فاضي يقرأهم شي فنتاستيك (كوميدي ترجيدي) بوقت واحد
طبعا هدا كله مو من تفنيكاتي، قلت لكم هدا قانون العقوبات السوري المعمول فيه لهلق، ولعلمكم هو صادر بعام 1949 وهو مأخود شبه حرفيا عن قانون العقوبات الفرنسي اللي صدر بعد التحرير وكان تحت تأثير تجربة الاحتلال النازي وممارساته وتفاعلاته.. والفرنسيين من زمان حلقوا لهالمواد كلها.. أما نحن (الله محيي الثابت) نحن متمسكين بتراثنا مو متلهم!!
يعني قانون عقوبات بيضحك.. قانون تظاهر بيضحك أكتر.. عفو رئاسي بيفرط من الضحك.. إعلام بيضحك.. رئيس بيضحك.. دولة بتضحك..
وبعدين لسى بتسألوني ليش الناس عم ترقص وتغني وتنكت وتضحك بالمظاهرات!!!
ليست هناك تعليقات:
إرسال تعليق