من كام يوم وأنا عم تضل ترن براسي اغنية (انا بين نارين) لأني بصراحة بين نارين حقيقة.. يعني إذا قلت إني مع الحماية الدولية للشعب السوري.. فأنا عارف تماما انه هدا شي مو بإيدنا وما بعرف شلون رح ينفذوا هالحماية.. ومتأكد أنه هدا رح يكون إله تمن كبير.. ما بعرف مين رح يدفعوا انا والا اولادي والا أحفادي.. طيب إذا انا كنت مو مع الحماية الدولية.. فكل يوم عم يستشهد العشرات ويعتقل المئات وينهان الآلاف تنذل الملايين من شعبنا.. (انا بين نارين)
أنا عم حاول كون مع مبادرة الجامعة العربية.. وبتمنى من قلبي أنه تنجح أو تقدر تقدم شي.. بس ما شايف انها قادرة تساوي شي مستاهل ولا انا واثق انه قرارها مستقل.. طيب أنا ضد مبادرة الجامعة ورح قول انها ماتت او انولدت ميتة.. طيب شو البديل؟؟
تدويل القضية أكيد.. بس يمكن الأعمى بيشوف انه صار توافق أمريكي روسي صيني أوربي تركي أنه التدويل لازم يصير عن طريق الجامعة العربية.. وإنه ما رح يصير تدويل لتقتنع هي الدول أنه الجامعة استنفذت فرصتها.. ولحد ما تصير عندهم هالقناعة قديش رح يكون بقي من الشعب السوري!؟
أنا مع سلمية الثورة للنهاية.. بس أكيد مو قادر لوم اللي عم يرفع السلاح أو يدعي لحمله.. ولا قادر إني اقنعه رغم اني مقتنع انه السلمية أقوى من السلاح.. يمكن لإنه النظام ما ترك للسلمية مطرح.. ولا للسياسة محل.. ولا للعقل دور
(أنا بين نارين) إذا الثورة تحولت للسلاح أنا شو بدي ساوي أنا مو زلمة سلاح أنا زلمة قلم كلمة والكلمة ما ممكن تنسمع بين ازيز الرصاص ودوي المدافع.. وإذا الثورة ما اتحولت للسلاح مين اللي بده يكبح هالوحش الهايج ومين بده يفهم هالجحش اللي قاعد قلوبنا
إذا الثورة صارت مسلحة أكيد عدد الضحايا رح يكون كبير جدا ومن الطرفين وأنا ضده.. بس إذا الثورة ضلت سلمية مين بيقدر يضمن أنه ما يصير مدابح ومجازر
إذا الثورة تحولت لمسلحة أو تطورت لحرب أهلية أكيد رح يكون إلها امتداد إقليمي.. وأكيد رح يصير تدخل خارجي.. وبصراحة انا مو واثق انه هالتدخل الخارجي رح يكون لصالح الشعب السوري، ويمكن يصفي حساباته بالمنطقة ويخلي الشعب السوري وقودها..
بس بنفس الوقت مين قال أنه مو من أول ما بدت الثورة فيه تدخل إقليمي ودولي واضح!!
أنا متأكد أنه اللي عم تقوله هيئة التنسيق الوطنية فيه شي كتير من الصحة.. وفيه نضج سياسي.. وهدا كلام المنطق والعقل.. بس ما قادر إلا إني قول قلبي مع الثوار وتنسيقياتهم والمجلس الوطني.. وأنا بين نارين
طيب بالنهاية شو نساوي نترك الثورة ونرجع لبيوتنا كأنه شي ما صار؟؟ حتى هدا ما عاد ممكن أبدا إذا ما كان أسوأ حل بظل هيك نظام..
طيب شو الحل اليأس.. لاء يابني شعبي.. انا متأكد أنه رح ينطبق علينا قول الشاعر:
ضاقت فلما استحكمت حلقاتها فرجت وكنت اظنها لا تفرج
ليست هناك تعليقات:
إرسال تعليق