من كم يوم طلع لنا "بيشو" بقرار بتشكيل لجنة لصياغة دستور جديد عتيد.. ومشان اللي مو سوريين منوضح لهم انه "بيشو" هي الدلع لاسم بشار وبتنقال لرفع الكلفة –بلا منقودية- وللتحبب.. يعني بعد هدا المقال ممكن تقولوا انه جحا صار واحد من المنحبكجية لبيشو..
بس وبصراحة اللي ما حبيتتو بهالموضوع كله هو كلمة الدستور –دستور من خاطركم يا اسيادي- لإنه كلمة دستور بتذكرني -مو بس أنا أي سوري كمان- بمشهد مشهور للماغوط من مسرحية غربة.. يعني بصراحة كلمة دستور بذهن كل سوري –بوعي او بدون وعي- صارت مرتبطة بتلات كلمات مو حلوة أبدا.. وهي (السجن، الحمار، الخرج)
طبعا الكل بيعرف التنتين الأولانيات بس كمان مشان غير السوريين منقول لهم أته السوريين لما بدهم يطنشوا شغلة أو يتجاهلوها.. او ينسوها.. بيقولوا عبارة (حط بالخرج).. حتى باوائل القرن الماضي طلعت بسورية مجلة ساخرة اسمها (حط بالخرج) وهي من أول المجلات الساخرة في الوطن العربي إذا ما كانت الأولى..
وبصراحة أكتر أنا رأي الشخصي أنه نلغي كلمة دستور بسورية نهائيا.. يعني نلاقي له غير اسم –شو الله ما خلق غيره- يسموه يا أخي: القانون الأساسي.. القانون الأم.. القانون الناظم.. قانون الجاذبية –ان شا الله- المهم يبعدوا لنا عن كلمة دستور (إيه يحرق حريشه هالماغوط شو كان ابن.. إيه كرهنا بهالكلمة سبع أجيال لقدام.. متل ما كرهنا إحسان عبد القدوس –بزمانه- بشوفة بنت لابسة نضارة..)
لكان قولت لي: بيشو شكل لجنة لتفصيل دستور.. إيه حط بالخرج ياه.. ولشوف شو بده يوسع هالخرج ليوسع..
يعني شكله الدكتور "بيشو شو" مفكر إنه الشغلة بسيطة.. وإنه عندنا شوية وجع راس عالماشي.. وانه الدستور الجديد حبة سيتمول منشربها مع كاسة د.. مية.. مية بيمشي الحال.. وبعدها (حط بالخرج)
وكأنه هال.. قصدي هالمعلم مفكرنا الحمار بهالموضوع!!!
يعني هو صحيح نحن إلنا أربعين سنة حاملين الخرج ع ضهورنا.. ومن تم ساكت.. بس هو بيعرف شو يعني كلمة معلم بالسوري الفصيح.. وإذا لهلق ما بيعرف!!! هون المصيبة!!!
وكأنه بهالأربعين سنة كانت مشكلتنا بالدستور الحالي (دستور من خاطرك يا ..)
يعني هو صحيح دستور كان مفصل على مقاس صباط حافظ تمام.. وعاطي صلاحيات- ما أنزل الله بها من سلطان- لرئيس الجمهورية.. ومحتكر الحياة السياسية للمرحوم حزب البعث وذيله القصير (الجبهة الوطية).. بس كمان الدستور –تبعهم- بينص على الحريات العامة الأساسية.. وأولها عدم جواز استخدام التعذيب أو معاملة أي مواطن معاملة مهينة او غير لائقة.. وهدا طبعا بعد عدم جواز توقيف أي مواطن إلا بأمر قضائي.. وعدم جواز اقتحام البيوت أو التنصت..أو.. هدا قيمك عن موضوع حرية الرأي.. وحرية العمل النقابي وتشكيل الجمعيات.. وحرية النشر.. واستقلال القضاء.. ومساواة المواطنين أمام القانون.. والعدالة الاجتماعية.. والملكية العامة لوسائل الإنتاج..
وضيفوا لي على كل هدا: إنه سورية وقعت على كل اتفاقيات حقوق الإنسان الدولية.. من العهد الدولي لحقوق الإنسان الأساسية.. لاتفاقية حقوق الطفل.. للعهد الخاص بحقوق المرأة.. إلخ.. وكل هي الاتفاقيات بتنص بأخرها بأنها في حال التوقيع عليها بتصير متل جزء من دستور البلد الموقع..
طيب وين راح كل هدا يا بيشو؟؟؟؟؟؟؟؟؟
انحط بالخرج!! طيب وين الخرج؟؟؟ على الحمار!! و وين الحمار؟؟؟...
قلت لكم ما بدنا كلمة دستور، هي بتفتق لنا جروحاتنا كلها.. ما صدقتوني!!
هلق منين بدكم تجيبوا خرج جديد يوسع الدستور الجديد اللي اللجنة العتيدة رح تقعد تنقش فيه أربع شهور كاملة..
طيب: بالآخر يعني، شو طلع معنا نتيجة؟؟
النتيجة: في عندنا أربع إجابات وسؤال واحد.. ووسائل المساعدة (1- حذف ثلاث إجابات.. 2- الاستعانة بصديقين)
الإجابات: 1- الشعب السوري 2- الدستور الجديد 3- الخرج 4- بشار الأسد ونظامه
وسؤال المليون: وين الحمار بالموضوع؟؟!!
ليست هناك تعليقات:
إرسال تعليق