عجبتكم عبارة (عود على بدء)؟ مو مهم أنا عجبتني، ما هالأيام كل مين عم يقطش ويلحش على كيفه اللي بيقول نحن اقوى من تركيا واللي بدو يمحي أوربة.. واللي بدو يعمل انقلاب بقطر.. يعني كله قطش ولحش وتفتيق..
ونحن الشوام كمان إلنا قطشاتنا وتفتيقاتنا.. ومنها إذا مو عاجنا الحكي او الشخص منقول: أهم شي الأخلاق وريحة الجرابات.. ولا تسألوني شو معناها ترى الشغلة ما بدها احراجات لإنه أنا شامي تقليد شغل تايوان..
حاصله لو حلينا جملة المعادلتين (عود على بدء.. أهم شي الأخلاق وريحة الجربات) منرجع مرة تانية لخطاب المعلم.. مو وليد.. لاء الأكبر.. ليش يا حزركم؟؟
لإنه قال بالحرف: (..الضمانة الأهم لنجاح عملية التطوير التي نقوم بها.. ترتكز على ثلاثة أسس هي الوعي والأخلاق والمؤسسات..)
طيب وين ريحة الجرابات بالموضوع ؟؟ حدى شامم شي ؟؟
هي بالحقيقة ريحة الجرابات طلعت بعد كم سطر لما شرح لنا شو هي الأخلاق.. (التخريب الأخلاقي والسلوكي الذي يصعب إصلاحه.. والذي نرى البعض يعمل على تكريسه.. ويكرس معه عدم احترام المؤسسات وما ترمز إليه وطنيا وبالتالي تراجع الحالة الوطنية التي تؤسس وتحمي الوطن.. وهذا بالضبط ما يريده اعداؤنا)
حدى شم ريحة الجرابات المأنتنة هي ؟!!
معقول في حدى اخد له شوية جراثيم ومزكم !!
طيب المعلم عنده جرابات ولادي ريحتها شو؟ تشق الصدر وتفتح منخير المزكوم.. (لدينا جيل من الأطفال تربى بهذه الاحداث او تعلم الفوضى وعدم احترام المؤسسات.. عدم احترام القانون.. كره الدولة.. هذا شيء لا نشعر بنتائجه اليوم.. سنشعر لاحقا وسيكون الثمن غاليا..)
لسى فيه حدى ما شم ؟!!
لاء هدا بيكون اخد له شوية جراثيم مندسة متحورة.. ولازموه زيارة للدكتور ليظبطه
مع تحيات شركة ديتول الراعي الرسمي والوحيد للخطاب
جحا الدمشقي
ليست هناك تعليقات:
إرسال تعليق