أمس خرجت بشينة ثعبان من جحرها فجأة بعد سبات طويل وباغتتنا بلسعة مفاجئة قوية بلغت شدتها تسع درجات على مقياس ريختروف لخداع الشعوب
وقدمت السنيورة جهدها مشكورة.. وإن تكن في الحقيقة أكثر من مأمورة.. ويبدو انها متل لعبة بتتحرك وبتحكي بالريموت كونترول.. وعم يلعبوا فيها وبغيرها متل الفتبوول.. بس يعني قيمكم من هالسيرة لنشوف شو قالت المستشارة.. لإنه قالت كلام كبير وبيخدر الحسم والعقل تخدير.. وبعد المديح والكلام المليح.. قدمت الخانم مقامة فن اللسع في شرح المعلقات التسع للشاعر بشار السبع..
وقال اهم شي نقوي مناعتنا الوطنية.. وما نسمع الاخبار من الجزيرة والعربية بس من الدنيا والإخبارية السورية مشان ما تنتقل إلنا الجراثيم ويضطر الجيش يعملنا عملية جراحية بدون تعقيم.. وقال لا تخافوا كل رح ينحل بالحوار الوطني العظيم.. فحطوا رجليكم بمية باردة واتركوا إلنا التدبير والقيادة..
متل ما قلنا اهم شي المناعة الوطنية وانتو عارفين يا جماعة انه سم الحيايا اكبر مقوي للمناعة.. مشان هيك استعمل النظام المتل المصري اللي بيقول: (ارموا تعبينكم وانا رح ارمي تعابيني)
ومشان هيك طلعنا المسيرات الأفعوانية.. وبعت لنا كمان مبعوث العناية الإلاهية وليد المعلم ليعطينا شرح المفردات.. و المبعوث السامي رح يكون إله دور كبير في مستقبل الكرة الأرضية كلها.. مشان هيك بحب طمن كل المهتمين بالبيئة واللي خايفين على القطب الشمالي إنه يدوب ويرفع منسوب البحار رح نقول لهم الحل وليد المعلم لوبعتناه لهنيك منعطيكم كفالة دولية شاملة خمسين سنة.. وهيك سورية ما إلها إلا هدا الحل لتلعب دور دولي جديد.. لإنه ما عاد رح ندور عالقريب رح نفتح عالواسع..
المهم ما بعرف ليش المعلم ذكرني بمسرحية غربة والمناضل غوار لما قال: قال كل حديثنا بدو محي.. يمكن لإنه فات عالمؤتمر حامل قلم رصاص ومحاية.. محاية كبيرة.. كبيرة بتطلع من تركيا لبريطانيا..
وقال بمنامه أهم شي الحوار..و ان شاء الله ما يخلوه يحط إيده بالحوار أوالوضع الداخلي لإنه رح تكون النتيجة دخول سورية في العصر الجليدي.. ويمكن أوربة تتأمر علينا وتقطع رزقنا وما تخلينا نستضيف الألعاب الألمبية الشتوية..
جحا المتجمد الدمشقي
ليست هناك تعليقات:
إرسال تعليق