تلات اشياء، شو العلاقة بينها يا ترى؟ معقولة على نفس مبدأ الفيلم العربي (سمك.. لبن.. تمرهندي) لما سألوا مخرجه شو معنى هالاسم؟ قال: تلات اشياء سخيفة ما إلها علاقة ببعض متل الواقع العربي بوقتها
مع انه العقل العربي وقتها كان مغرم بالثنائيات المتقابلة متل (العروبة و الاسلام.. الاصالة والمعاصرة.. التراث والحداثة...) وإجت هي الثلاثية (سمك.. لبن.. تمر هندي) صاعقة بوقتها.. بس بزمن الربيع العربي طلعت كتير ثلاثيات متل عنواننا ! ويمكن اهم ثلاثية هي اللي فبركها النظام السوري في تفسير الاحداث بالاشهر الماضي وهي (المندسين والمسلحين.. المؤامرة الخارجية والقنوات التحريضية.. المقاومة والممانعة)
طيب شو علاقة هدا بعنواننا!!
انا رح اقترح ثلاثية جديدة لنقرب الموضوع وهي (انا مقتنع برواية النظام.. انا بس بدي افهم.. شو اخرتها!!!!)
يعني انا باصم لهم بالعشرين انه فيه مندسين وفيه عصابات مسلحة.. وفيه تحريض.. وفيه مؤامرة خارجية.. بس بدي افهم ليش الحكومة بطلت تشيل الزبالة اللي عم تصير كوام كل كوم قد جبل وريحتها عم توصل لتركيا ولبنان وما حدى لحدى بالأخص بحمص وحماة درعا ليش يا ترى؟!
والله ما بعرف.. يعني انا اول مرة بحياتي باسمع بدولة عم تتعرض لمؤامرة بتبطل تشيل الزبالة!!
قولكم ممكن همة قصدا عم يتركوها لتطلع ريحتها وتطرد المؤامرة الخارجية متل شعل البخور لطرد الارواح الشريرة!!
او ممكن يعني انه الزبالة مجنديهم لمهمة اسمى هي محاربة المؤامرة الخارجية!!
والا الزبالة همة من المندسين اللي قصدا ما عم يقيموا الزبالة لتتكوم وتشوه البلد!! وهدا جزء من المؤامرة!!
كل شي ممكن.. يعني هي ممكن نلاقي لها تفسير.. بس مين بيقدر يلاقي لي تفسير ليش الجيش السوري عم يقتل الحمير!!؟
يعني هدول شو؟ مندسين!! والا عصابات مسلحة!! والا جزء من المؤامرة الخارجية!!
طيب يعني فيه حمار واحد منعرف ليش قتلوه وهدا الحمار اللي كتبوا عليه بشار بالبخاخ وفلتوه بالشوارع بس ما بعرف مين صار اشهر حمار بالعالم هدا الحمار المبخوخ والا الحمار اللي قتله!!! (وعجبي على قولة المرحوم صلاح جاهين)
يعني هو اكيد انه الحمير كترت بسورية بشكل عجيب بالأشهر الماضية.. وكل ما طلع لنا حمار منقول هدا هو الحمار اللي هو بيطلع لنا احمر منه
بس بصراحة مع اني متل ما قلت مقتنع بكل روايات النظام بس بقول كمان انه هي مو طريقة صحيحة لتقليل عدد الحمير بالبلد.. ولا هي انسانية وممكن تجيب إلنا إدانة دولية وتقلب علينا جمعيات الرفق بالحيوان..
أنا باقترح انه نصدر فائض الحمير اللي عندنا.. وهيك رح نحل الأزمة الاقتصادية بالبلد.. ونفك الحصار ونهزم المؤامرة الخارجية ونكيد القنوات التحريضية كمان
لمعلوماتكم كمان انه المغرب من كم يوم ساوى مهرجان خاص للحمير ساووا فيه سباقات ومسابقات لأجمل حمار وأذكى حمار.. واقوى حمار... وعملوا مزاد خاص للحمير
انا بتوقع اذا نحن اشتركنا السنة الجاية منحصد كل الالقاب.. لإنه – ما شا الله- عندنا كل حمار شي ما صار!!
هلق هي حكينا قصة الزبالة والحمير طيب شو ضل من الثورة ؟!
ضل هالشفة.. رح نشربها ونخلص
مع الاعتذار للح.. اللي قال هالمقولة
ليست هناك تعليقات:
إرسال تعليق