يعني نيرون بزمانه حرق روما مشان يكتب قصيدة شعر على ضو النار
فكتير يعني إذا بشار دمر سورية مشان يساوي حوار!!
هدا حوار وطني شامل!!! مو قصيدة شعر! ولا لعب اولاد صغار
وهي رح نجيب لكم علي حيدر وقدري المعارضين الكبار
ويمكن نطبش لكم الوزنة بكيلو ونجيب لكم سارة ونحط لكم دليلة دليل للحوار
ونقوا لكم كمان هيك تشكيلة من كم معارص.. وكم بقرة.. وكم حمار
وتعوا نقعد على طاولة مستطيلة برعاية جميل الحسن والشعار
والحوار مفتوح وحبل الحكي –متل ما بتعرفوا- جرار
وممكن تجيبوا معكم ليستة مطالب.. ونحن منها منختار
روسيا والصين وإيران الدول الحيادية ولبنان والعراق من دول الجوار
بترعى وبتضمن لكم نزاهة وحيادية ومصداقية.. هالحوار
ومتل ما بقول المتل: الصلح سيد الأحكام.. والجار قبل الدار
ولا تنسوا.. الجيش.. الأمن.. الطائفية والممانعة خطوط حمرا وزادت احمرار
وانسوا لنا الدم اللي سال.. والإرهابين المسجونين.. والخراب والدمار
هي مو مستاهلة..شغلتها بسيطة وحلها أسهل من شرب السيجار
وانسوا لنا مجلس أردوغان ومجسمات قطر وثورة الفيس بوك واللي كان وصار
وبعدها كل الاحتمالات مفتوحة.. ونحن حضنا كبير اكبر من الجامع والبار
منضمكم من جديد بحضنا ومنطبطب لكم شوي ومنعطيكم اللي ما خطر بعقل ودار
يعني مثلا: ممكن نحن نضل نحكم.. وانتو ضلوا تظاهروا ليل مع نهار
بدكم تغنوا.. بدكم ترقصوا.. تدبكوا.. أو تساووا حلقات الميلوية والزار
ولو بدكم منضل هيك متل "توم وجيري" حلقات ما إلها نهاية بلعبة القط والفار
بس بيضلوا ما إلهم غنى عن بعض.. ورغم المقالب.. يا شر ما دخلك دار
وصدقوني ما حدى رح يئذيكم من جد.. وكله مزح.. وضحك.. وهزار
وما حدى رح يجي صوبكم.. طالما إنتو أوادم.. وتحت سقف الوطن والبصطار
وهدا أول حكي.. آخر حكي عند الرئيس المنتخب المحترم المقاوم الممانع بشار
ولا تصدقوا اللي بيقوله الأعداء والحاقدين والمحرضين: انه كلام الليل يمحوه النهار
وعيشوا بظل الامن والامان.. وعيشوا بنعمة هالح..
ولا يصوت يعلوا فوق صوت الخوار
ليست هناك تعليقات:
إرسال تعليق