كان ياما كان في قديم الزمان كان فيه سلطان اسمه عمو أوباما الحنون في مغارب الأرض
ولما بلغه ما يفعله السلطان المجنون بشار بشعبه المسكين، من قتل وتعذيب وقصف بالمدافع والطائرات.. انهز بدنه شوية
بس لما بلغه أن بشار يمكن يستخدم الكيماوي والبيولوجي كمان عصّب عمو أوباما.. واستل الموبايل واتصل على بابا بيشو وقال له: شوف ترى هدول اولادك، وانت حر فيهم.. بتربيهم بالطريقة اللي بدك اياها.. بتسجنهم.. بتعذبهم.. بتقتلهم.. بتقصفهم.. ما عندي مشكلة.. بس تستخدم الكيماوي لاء.. ترى بزعل منك.. وبساوي أدنيي وأدنيك أربعة
عمو أوباما، دخيلك قلنا شلون بدك تساوي أدنيك وأدنيه أربعة؟! شو يعني عندك اربع ادنين ونحن مو عارفين!!
والله مو قصدي أربع رجلين.. لا تفهمني غلط.. لأنه لو هيك كان لازم تقول له: بساوي رجليي ورجليك تمانة.. ودنبين عالبيعة كمان
معلش عمو أوباما، سوري منك، يعني بالعربي عدم المواخذة، بس بدي اسألك كونك الكبير هون بهالكرة اللي عم تلعبوا فيها.. قصدي اللي عايشين عليها
هو سؤال بريء دخيلك ما تفهمني غلط.. وتفكرني إرهابي وتبعتني على "غوانتي ناموا" وبهالمناسبة همة فاقوا؟؟ والا لسى ما فاقوا؟!
مو هدا سؤالي.. بس هيك عم نهز ما بعرف شو.. لنشم ما بعرف إيش..
معلش خلينا بالجد هلق: عمو أوباما يعني انت شايف شي فرق بين الموت بالكيماوي او بشي تاني؟؟!
بصراحة أنا بدي اختلف معك شوية يا كبيييير.. بس يعني أنا شايف أنه الموت تحت التعذيب بالسجن أصعب من الكيماوي والا –أعوذ بالله- الدبح على إيدين الشبيحة "تف من تمك" وإلا برصاصة قناص "يا غافل إلك الله" والا بانفجار "يساوينا نتف كل نتفة قد الفرنك" أنت بتعرف الفرنك شي؟ لاء نسينا انت بتتعامل بالدولار والسنت! يعني قد السنت سيدو.. والا بقصف طيارة يهرسنا تحت الأنقاض "يعني فوق الموتة عصة القبر".. إيه والله صعبة
تقبرني عمو أوباما، أنا رأيي ترجع تتصل على بابا بشبوش.. وتقول له: انه يستعمل الكيماوي أحسن وبأقصى سرعة وبأكبر كمية.. خليه يستهلك كل المخزون اللي عنده دفعة وحدة.. هيك أكيد انتو بتخلصوا منه
ونحن منخلص منه ومنك كمان.. إيييه... أختك على ... أخته الأرملة.. على ... أخت هالعيشة معكم
مع عدم المواخذة.. ترى بس ضارب لي شوية كيماوي
ليست هناك تعليقات:
إرسال تعليق