شكرا لمئات الآلاف من السوريين والسوريات الذين خرجوا إلى الشوارع أمس نصرة لأنفسهم.. لقد انتشلوني من تحت أنقاض القصف.. وأعادوني إلى الحياة من جديد
كان والدي يقول لي دائما: عدو عاقل أحسن من صديق أحمق
وقال فيلسوف: ربي أجرني من اصدقائي.. أما أعدائي فإني أعرفهم.. وإني كفيل بهم
وقالت المطربة أحلام: ..تختلط عندي الوجوه، العدو يصبح صديق!!
هي تلات معادلات بتلات آلاف مجهول..
ويمكن بدنا تلات مية سنة لنقدر نحلها !! او بدنا نخترع انشتاين جديد موديل السنة ليساعدنا بهالموضوع.. ويمكن نطعمه على تشرشل سياسيا ورومل عسكريا.. و شورلك هلمنز.. وهيهات ينجح بعدها!!
يبدو أننا عقدنا الشغلة أكتر.. يعني اللي ذكرناهم هدول كانوا اصدقاء والا اعداء كمان؟؟
إذن –يلعن روحك أبو حافظ- يجب أن نعرف أولا من هو الصديق؟
لإنه اللي باين أنه –يلعن روحك أبو حافظ- تأثير بشار صاير كبير على السياسة الدولية بدليل كتير من الحكي اللي انقال امبارح بمؤتمر تونس.. (تعاريف.. تفاصل.. دروس تقوية لمنهاج الإعدادي.. بس بدون ضحك وكهكهة..)
وعلى سيرة تشرشل -يمكن روحه طلبت اللعنة- لإنه شكله كان حاضر معهم كمان، مو هو اللي قال: السياسي الناجح هو اللي بيجاوب عن الأسئلة بأقل عدد من الكلمات دون أن يضيف لمعلومات الحاضرين شيئا..
ومعظم اللي حضروا طبقوا القاعدة بنجاح.. (مو نجاح العطار، وأنا مو عم اتمسخر، لا تنسوا أنها نائبة رئيس.. ويمكن إذا مشينا على هوى بعض الأصدقاء تصير معلمتنا..)
طيب باعتبار إني أنا جحا أذكى من أنشتاين بكتير اللي شايفه أنه صعب نعرف الأصدقاء، مشان هيك خلونا نبدى بتعريف الأعداء أحسن واسهل
بما أنهم غيروا اسم المؤتمر بالآخر لأصدقاء الشعب السوري، فلازم نعرف أعداء الشعب السوري
أكيد أكيد أنه العدو الأول للشعب السوري هو الكيان الصهيوني.. ولو ساويتوا استفتاء حر يمكن تكون نتائجه متل نتائج أي استفتاء عربي غير حر
العدو التاني: اللي كان عم يحاول يوهمنا انه عدو للعدو الاول!!! وكان مفكر أنه المية ماشية من تحتنا ونحن مو دريانين.. والحقيقة نحن ما كان عندنا الأدلة الكافية (بس هلق: كل شيء انكشف وبان)
والعدوين طلعوا متحالفين من زمان!! بس كان عالمخبى وصار عالمكشوف.. وانحلت المعادلة اللي كانت محيرة البعض لحالها من سنة أولى ثورة
يتبع (لا تنسوا المعادلات التلاتة رح ترافقنا بالحلقات الجاية)
ليست هناك تعليقات:
إرسال تعليق