واضح حتى للأعمى أن الخلافات الرئيسية بين القوى الفاعلة في الثورة السورية عم تبدى من عند طرح موضوع الحماية الدولية.. وما يستتبعها من مقولات ( الحظر الجوي، المنظقة العازلة، الممرات الآمنة.. التدخل الخارجي)
وإذا ما كانت هي المواضيع بده يصير عليها اختلاف على شو بده يصير بقى!؟
ما هي مواضيع ملتبسة بحد ذاتها.. وعلى قد ما هي سهلة باللفظ و إلها رنة حلوة خلتها بسهولة تصير شعارات تنرفع بالشوارع وتصير لافتات يحملها الكبير والصغير والمقمط بالسرير.. على قد ما هي مواضيع معقدة جدا (وإلها إيدين ورجلين) يعني فيه حسابات كتيرة لكل الأطراف وفيه تبعات الله أعلم لوين بتوصل!! ولإمتى بتمتد!!
وبصراحة كل اللي حكوا بهالمواضيع سواء من المعارضة السورية أومن الأجانب ما حدى قال شي مقنع أو مفهوم.. ومعظمهم تم إحراجهم إحراجات فاضحة بالأخص على "البي بي سي" اللي ناقشت هالمواضيع بعمق، مو متل الجزيرة والعربية اللي عم يمرقوها بدون تدقير، مع هيك المتحدثين لحالهم وقعوا بتناقضات مضحكة أحيانا وطرحهم ركيك وسطحي وبالعامي الفصيح (مقطع موصل)!!
وبصراحة: أنا متأكد أنه يا إما هدول مو فاهمين الموضوع وعم يحاولوا يوهمونا إنهم فهمانين.. أو أنه في شي عم يحاولوا يخبوه مشان هيك عم تبين هي الفجوات بكلامهم واللي كل واحدة منها بتفوق قافلة جمال.. أو الاتنين مع بعض
بصراحة أكتر: أنا أميل للتفسير التاني.. مو من باب التخوين أو التشكيك.. بس واضح أنه فيه مشكلة بهالنقطة بالذات، وكل الناس شايفتها وحاستها ومتأكدة من وجودها بس عم تحاول تتجاهلها متل كأنها مو موجودة يعني متل ما بيقولوا الإنكليز للتعبير عن هالحالة (الفيل في الغرفة)
يعني أنه يكون في فيل معنا بالغرفة هي مشكلة كبيرة!! بس ما حدى قادر يتعامل معها.. مشان هيك بيصير التواطؤ الضمني بإنه نتجاهلها (هدا بالضبط قصد المتل الإنكليزي)
بس جحا رح يكسر التواطؤ ويفسد عن قصة الفيل.. وملخصها أنه الثورة السورية لما بدت كانت مستلهمة الثورة المصرية وبالآخر صارت أميل للتجربة الليبية
بس الليبين من البداية تعاملوا مع الفيل وصار توافق وتصريح واضح –بدون مواربة- بأن الثورة ما بتقدر تسقط النظام لوحدها ولازم تدخل خارجي بأي شكل، وهدا التدخل الخارجي رح يكون إله تمن كبير بس هدا أقل من تمن بقاء النظام..
أما بسورية لهلق ما حدى راضي يصرح بهدا اذا كانت هي قناعته ليقنعنا فيها.. وعم يحاولوا يلفوا ويدوروا على الموضوع ليقنعونا أنه ما فيه تمن.. مرة بيقولوا تدخل إنساني.. مرة حماية أممية بالفصل التامن.. ممرات إنسانية..
منكمل بعدين هلق الفيل لف خرطومه على تمي
ليست هناك تعليقات:
إرسال تعليق