اعزائي المشاهدين كما وعدناكم نتابع برنامجكم المفضل (سوبر حمار) من مجمع صحارى السياحي مع مزيد من المتسابقين على اللقب الكبير.. ونبدأ مع المتسابق (فسفاس النوزي) صفقة كبيرة.. كبيرة.. وخلونا نسمع منه.. ونسمع رأي اللجنة فيه
جحا (ج) | جحا (ب) | جحا (أ) | اسم عضو اللجنة |
20% | 30% | %25 | الدرجة |
حركاته معبرة.. نظرته للجمهور فيها دعوة للتواصل.. فيها حنية فيها حميمية.. بس قعدته كانت مجعية شوية اكثر من اللازم | لبسه بيعقد.. سنبل بس مزوق الضربان.. والألوان تفرفش تنعنش.. ومو تردشنال ابدا بعطيه لايك كبيرة | شكله فني.. وتسريحة شعره غير.. طريقة حطته للنظارة غير.. كله على بعضه غير.. غير | تعليق العضو |
صوتوا بكثافة لحبيكم فسفاس ترى لا تقولوا جايب درجات عالية اليوم المنافسة حامية.. اعطوه ترى بيستاهل بكفي كل الوقت ماسك المايكرفون بإصبعتين بس.
المتسابق التاني: احزروا مين؟ حبيب الملايين!.. النجم الغائب.. النجم الكبير: (زوزي شعبولا).. حبيبي بالأحضان يا زوزي حبيب قلبي.. لاء أرجوكم اسمحوا لي اعمل معه مقابلة صغيرة ترى مشتاق له كتير.. كتير
- يا زوزي وين هالغيبة؟ وين كنت؟ ايه ما خلت عليك قرنة، وأنا عم دور عليك من قناة لقناة؟
- كان عندي ظرف صحي
- لك شو ظرف صحي يا زلمة ما شايف شو صاير بالبلد عنا كتير شغلات بدها تفسيرات زوزي.. بعدين حد علمي انه الإجازات المرضية ممنوعة هلق
- لاء انا كان عندي ذبحة صدرية
- إيه ذبحتنا يا زلمة.. كل يوم مطلعين لنا نمرة جديدة
على كل منرحب فيك مرة تانية يا عزيزي زوزي بسوبر حمار ونتمى ما تكون فقدت لياقتك وتفوز معنا ترى إنت اللي سويته طوال سبع سنين مو قليل وبتستاهل.. سمعنا لنشوف رأي اللجنة بعد هالغيبة
جحا (ج) | جحا (ب) | جحا (أ) | اسم عضو اللجنة |
25% | 15% | %20 | الدرجة |
الحركات معدومة.. حتى رمشه ما بيهز.. يخرب بيته شي عامل دورات تدربية اذا بعد الغيبة هيك.. وحطة إيده عالطاولة ذكرتني بجميل عازر تبع الجزيرة | اللبس أنيق.. معبر متناسب مع حديثه.. الألوان قاتمة شوي.. والكرافة طلس عمت على قلبي والله | شكل متناسق متناغم.. وصلعة معبرة متناسبة مع المضامين الفلسفية العميقة وبتذكرني بسقراط.. والنظارة بتذكرني ب.. | تعليق العضو |
ما بدي وصيكم فيه ترى بتعرفوا انه حبيبي فصوتوا إله احسن ما نضطر نزور النتائج ترى الشغلة بإيدنا ونحن منحط ادن الجرة وين ما بدنا بس معلش فيه شكليات للديمقراطية لازم نلتزم فيها.. بعدين اذا ما سوينا تصويت للجمهور بالموبايل بيغضب علينا رجل أعمال الخير (مامي خروف) وهدا الله يجيرنا من غضبه ترى دعوته مستجابة دغري ومكشوف عنه – يا لطيف – هدا برقبته هلق ما بعرف كم مية الف عايشين من خير الله وخيره.. فهبوا لعمل الخير وصوتوا بإس إم إس وخلوا بالكم من زوزي
المتسابق الثالث: (ه.ب-ر.س) ما بعرف يعني شلون بدنا نتصرف لإنه صاير يبدو خطأ كبير عند لجنتنا وما منتبهين انه هالمتسابق وحدة ست.. وهي شلون بدها تظبط معنا ما بعرف.. يعني برنامجنا (سوبر حمار) وإذا بدو يصير سوبر حمارة بدو ينتزع الوزن.. بس شو بدنا نساوي هلق عذبوا حالهم وإجوا خلينا نسمع منهم بركي بيطلع معهم شي غير باقي المتسابقين
جحا (ج) | جحا (ب) | جحا (أ) | اسم عضو اللجنة |
15% | 15% | %15 | الدرجة |
ما بعرف شو قول.. الحركات مو متناسبة مع الموضوع.. والحكم للجمهور | هو فيه شوية أناقة.. بس يعني ما بعرف.. شي محرج.. والحكم للجمهور | شكل ماشي الحال.. الله يستر علينا كلنا.. هو.. ما بعرف الحكم للجمهور | تعليق العضو |
طيب اللجنة متفقة انه الحكم للجمهور وأنا متفق مع اللجنة أن الجمهور لا رح يقرب ولا رح يأخر وعلى مبدأ المتل الشعبي طالما هالكلب على الباب الشغلة بدها تكبر
ننتقل للمتسابق الأخير اليوم وهو المفاجأة الكبرى لهالموسم:( طابل برهوما).. صفقتين كباركتير إذا سمحتوا.. بيستاهل.. خليه يجود ويسمعنا
جحا (ج) | جحا (ب) | جحا (أ) | اسم عضو اللجنة |
30% | 30% | %30 | الدرجة |
الحركات مناسبة تماما.. معبرة تماما.. لا كتيرة ولا قليلة.. لا سريعة ولا بطيئة.. لا هادية ولا عصبية.. عزها | اللبس أنيق.. الألوان مناسبة.. لا فاتحة لا غامقة.. عزها تمام.. وكله تمام | الشكل المثالي تماما لا زيادة ولا نقصان.. لا طويل ولا قصير.. لاسمين ولا نحيف.. لا أسمر لا أبيض.. هو بعينه اللي عم ندور عليه | تعليق العضو |
تحية كبيرة للمتسابق طابل برهوما على هدا المجهود الكبير اللي بذله ليأخد هدا اللقب المهم لقب( سوبر حمار2011 )
بدي وشوشكم وشويشة بيني وبينكم تحت الهوا (هدا معه واسطة كبيرة واللجنة مظبطة وهدا هو سوبر حمار لهالموسم.. بس أصحى حدى منكم ما يصوت له ترى بيروح فيها تلات سنين بتهمة إضعاف الشعور القومي للأمة زمن الحرب)
تصبحوا على موسم جديد
واعذرونا الحلقة كانت جاهزة من 15/7
معد ومقدم البرنامج من صحارى
جحا الدمشقي
ليست هناك تعليقات:
إرسال تعليق