الطفل المعجزة شريف شحادة –الله يخليه لأمه- آخر شي طلع معه: إنه فيه مظاهرات احتجاج وفي مسيرات تأييد لبشار.. وإنه هدا عم يعرقل الأمور المعيشية للناس.. وعم بيعطل الانتاج بالبلد.. وعم.. وعم.. فعلى قولته خلص بقى بدنا نعرف نعيش.. بشار الأسد لا رح ينفعه تأييد ولا بتضره معارضة –حسب كلامه- فتعوا نلفها برمة وخلصنا بقى منوقف مسيرات التأييد ومظاهرات المعارضة وخلينا نعرف نعيش وننعم ببركات الاصلاح..!!
لك شي حدى يقول لهالخ.. هدا ويفهمو بالمعلقة إنه إذا وقفت مظاهرات الاحتجاج هو مين بدو يعيش؟ يعني هو قبل المظاهرات حدى كان سامع فيه أو قايموا من أرضه؟ فإذا سمعنا منه وقفنا شو رح يصير فيه هالذكي؟ يعني صحيح هالمظاهرات وقفت حال ناس كتير ولهلق ما حدى منهم شكا!! بس شغلت ناس كتير ومنهم هالفهيم، صحيح صدق المتل الشعبي اللي قال: (الله أحيانا بيموت أصيلة مشان عشى كلب)
حدى يقول له ويفهمو لهالح.. أنه مظاهرات الاحتجاج عم تطلع يوم الجمعة وقلب الأسبوع عم تطلع بالليل.. يعني لا عم تعطل الشغل ولا عم تقلل الانتاج ولا عم تعيق مصالح الناس.. وكل واحد من المتظاهرين عم يحمل اللي الله بيقدروا عليه ورقة او كرتونة صغيرة كاتب عليها اللي بقلبه
أما مسيرات التأييد هي اللي عم تطلع بوقت الدوام بقلب الأسبوع وعم يلموا الموظفين والعمال المساكين.. وعم يعطلوا الدوائر ويسكروا الشوارع ويحجزوا الميكروباصات، و.. و..
وعم يفننوا بالهدر على حساب هالشعب الغلبان شي أطول علم.. شي أكبر لافتة.. وشي أضخم صورة.. وإنه بركي حدى يشوفهم ما عم تظبط وما فيه غير تلفزيون الدنيا.. والدنيا فانية متل ما بقولوا
بقى يا شريف يا ابن شحادة لفها برمة انت وأمثالك نحن عارفين وإنتو عارفين.. فخلي الثورة ماشية والكلاب تعوي..
ليست هناك تعليقات:
إرسال تعليق