بالأيام القليلة الماضية كانت كانت مبادرة رياض سيف مالئة الفيس بوك وشاغلة
التوتير.. وملهمة الفضائيات الموالية والمعارضة و "التحريضية" واللي بلا
طعم ولون كمان!
وبغض النظر عن تفاصيل المبادرة.. لأني بحط بذمتي أكترية اللي كتبوا عنها
وعلّقوا عليها بأنهم ما قرأوها وبس قرأوا أو سمعواعنها.. وبصراحة أنا ما رح احكي
عن المبادرة.. لأنه اللي لفت نظر جحا هو التعليقات والتحليلات اللي انكتبت عنها
لأنها فعلا الشي اللي بيضحك بالموضوع!
طبعا أطرف تحليل وصلني، بيقول أصحابه: أنه هي شطارة التجار الشوام، اللي
بيعرفوا منين بتتاكل الكتف.. وبيعرفوا شلون بتنصاد الصفقات الكبيرة اللي بتخر
دهب.. واللي اتطرفوا أكتر بهدا الاتجاه قالوا: هي بلطجة التجار الشوام اللي طول
عمرهم ماصين خيرات البلد.. وأنهم سبب كل مصايب سورية.. لأنهم كانوا شركاء لكل
الأنظمة اللي مرت على البلد من زمن الفرنسيين لعند بشار.. وأنه هي المحاولة
الأخيرة لإنقاذ بشار وشركاءه من التجار.. وزادوا: أنه ما ممكن إسقاط نظام بشار
بدون إسقاط إحتكار التجار الشوام على الاقتصاد السوري.. ويمكن المضمر بهالحكي:
بدنا نبيد.... "بدون تعليق"
ناس تانيين قالوا: هي المبادرة مو شغل رياض سيف أبدا.. وأنها مبادرة روبرت
فورد، وأنه هو اللي كتبها بخط إيده.. وأبو سيف مجرد وكيل محلي للترويج بس!
وما بخبي عنكم أنه اتصل فيني شخص عالفيس بوك بيدعي أنه من الهيئة العامة
للثورة وقال لي بالحرف: أنه هي مبادرة أمريكية لإنقاذ بشار وأنهم عاملين حملة ضد
المبادرة وطلب مني أني أرسم لهم كم كاركاتير وسوّي لهم كم بوست بهالخصوص.. قلت له:
أنا ما إلي بالرسم والكاريكاتير ولا الفوتوشوب.. وإني بس بكتب مقالات وتعليقات
ساخرة على صفحتي ومدونتي.. فقال لي: ماشي الحال هات لك كم مقال عالسريع للحملة
اليوم أو بكرة عالأكتر! "سلق بيض يعني"!!
ناس تانيين قالوا المبادرة حلوة!!! بس إذا بدهم يدخلوا هيئة التنسيق فيها
رح يخربوها.. ويجيروها لمصلحة النظام!!!
يعني أنا حد علمي المرشحين من هيئة التنسيق اتنين أو تلاتة من أصل خمسين
يعني 6% على الأكتر.. افرضهم شو ما كان.. شياطين إذا بدك.. أو معارضة للمعارضة إذا
بدك، أو... طيب إذا نظام بشار عنده استعداد أنه يضم أي معارضة بنسبة أكبر من هيك
بكتير مهم يضل مسيطر على الأغلبية.. فمعقول أنه النظام الجديد رح يكون أفقه وصدره
أضيق بكتير من النظام اللي صارت عليه الثورة!!!
ناس تالتين قالوا: أنه هي صفقة من تحت الطاولة بين أمريكا فرنسا- روسيا
وإيران.. وانه الشعب السوري والثورة السورية ما إلها فيها شي!.. وإنها تفريط
ومتاجرة بتضحيات الشعب السوري ودماء الشهداء...
ناس رابعين قالوا: أنه هي المبادرة هي المصباح السحري اللي بس تفركه رح
يطلع لك المارد العملاق ويحقق لك كل أمانيك.. وأنه كل شي، من إسقاط النظام.. لتسليح
الجيش الحر.. لبناء الدولة الديمقراطية.. والمساعدات المادية وإعادة الإعمار.. كله
مرتبط بهالمبادرة، وبس تمشي وتظبط بتشوفوا التغيير اللي رح يصير!!!
وقالوا كمان: أنه الحاج أبو سيف ما طرح هي المبادرة ولا كان بيطرحها قبل ما
يأخد ضمانات من مية دولة على الأقل بالدعم الكامل إلها.. وبكرا بتشوفوا!!!
وين المبادرة من كل هدا؟! وشو كانت المبادرة دخيلكم؟! ووين رح نوصّل؟!
بصراحة جحا جن.. أو كان مجنون بالأصل.. وبده حدى عائل يفهمه
لو أنه فيه جحا تاني قبلي فهم.. قام مات بجلطة بالمخ
بسيطة.. كمان الثورة بدها تضحيات.. وأنا مستعد.
ليست هناك تعليقات:
إرسال تعليق