ترى سامحونا على الغلاظة وتقل الدم إمبارح وأول إمبارح، ترى هدا مو أنا
لاء.. لاء.. مو قصدي مو أنا يعني مو أنا، قصدي هدا أنا التاني.. أو أنا عالوش التاني.. يعني فيكم تقولوا: إني اتنين بواحد.. يعني يمكن – بعيد عنكم - عندي انفصام شخصية مزمن ويمكن لازم شوف لي شي دكتور شاطر
إيه على ذكر الدكتور اتذكرت القصة: كان يا ما كان في قديم الزمان وسالف العصر والأوان: كان فيه ولد صغير فاشل.. بعدين صار طالب فاشل.. بعدين صار مراهق فاشل.. بعدين صار جامعي فاشل.. بعدين صار دكتور فاشل.. قرر تغير المسار.. وصار ضابط فاشل.. صار ولي عهد فاشل.. بعدين صار رئيس فاشل.. وظل رئيس فاشل..
بالحقيقة هو ما كان فاشل.. هو كان عبقري ومبدع بكل مراحل حياته.. بس ما كان عارف يعبر عن حاله.. يمكن لإنه بيقرط بكم حرف.. حتى يحكى انه بهداك الزمان طلع مطرب اسمه إبراهيم قاشوش قال له: يا... يا مندس، تضرب انت وحزب البعث، وروح ظبط حرف الإس.. ويحكى كمان انه الشبيحة بهداك الزمان قتلوه وقطعوا حنجرته ورموه بنهر العاصي
بلا طول سيرة.. فجأة هدا طلعت كل مواهبه دفعة واحدة واتذكر الطب والدكتارة ودمجها بالسياسة على شوية فلسفة على تناتيف تاريخ وطرطيش جغرافيا وكثور.. وتجلى الإبداع بتلات خطابات تاريخية لسى عم تتدرس لهلق بمجال علم السياسة بكل كليات وأكاديميات العالم (حتى أنه يحكى أنه في مين رشحه لمنصب مختار القرية الكونية وقتها)
بس مو هدا كل شي لإنه اهم انجاز إله على الصعيد العلمي والسياسي كان ابتكار ابداعي رهيب أخد فيه براءة إختراع دولية وشرحه بكتابه المهم اللي سماه (كيف تعالج السرطان في ثلاثة أيام وثلاث حبات فقط) مازالت مخطوطاته محتفظ بصور مايكروفيلم عنها في اهم المكتبات العالمية.. و رح ننقل لكم ملخص مكثف عنها
طريقة العلاج:
اليوم الأول: على الريق –يعني قبل الأكل والشرب- افتح تمك شوية صغيرة تناول الحبة الأولى وسماها (حبة قانون الأحزاب) سكر تمك بسرعة.. إبلع ريقك فورا.. بعد دقيقة بتشرب نص كاسة مية فاترة.. بعد دقيقتين نص كاسة مية باردة..
اليوم التاني: على الريق.. افتح تمك.. خود الحبة التانية (قانون الانتخابات) سكر بسرعة.. نص كاسة مية فاترة.. نص كاسة مية باردة
اليوم التالت: افتح.. حبة قانون الإعلام.. نص كاسة مية باردة وبعدين بتقول دعاء الشفاء (الله.. سورية.... وبس) تلات مرات.. وبعد تلات ساعات وتلات دقايق وتلات ثواني بتلاقي حالك متل الحما.. متل الحصان ما فيك شي حتى لو كان عندك تلات انواع مختلفة من السرطان
العلاج الداعم:
- إذا سمعت مداخلة لطالب إبراهيم او شريف شحادة بعد كل حبة بيزيد مفعولها بنسبة 200%
- إذا تابعت مواقع الشبيحة على الفيس بوك بتزيد نسبة الشفاء 100%
- إذا ما اتفرجت إلا على قناة الدنيا طوال أيام العلاج بتزيد الفعالية 500%
- إذا كنت من عملاء سيرياتيل بتاخد 50% فري
الأعراض الجانبية:
- تلبك معوي خفيف
- إسهال مؤقت
- غازات
- تخلف عقلي محتمل
- جلطة مخية مؤكدة
ليست هناك تعليقات:
إرسال تعليق