خطاب من عصر المماليك

(..لو أردنا أن نتبع الدول التي تعطينا نصائح فعلينا ان نعود باتجاه الخلف على الأقل قرنا ونصف..)

والله ذكرني بقول الشاعر: وأصبح يخجل من الوراء الوراء

بدي أعرف مين قال لهالج.. (شو بقولوا له أهل حمص؟!) إننا شايفين بقطر أو غيرها من الدول العربية نموذج عم نسعى له أو معجبين فيه كتير

بس اللي ساواه هو وأبوه -غير المغفور له- انهم أعادوا سورية لزمن المماليك.. الذين اشتيرناهم بأموالنا لمحاربة الأعداء فاغتصبوا السلطة في غفلة من أهلها وجعلوها مباحة لكل الأعداء.. إلى زمن الخصيان الذين نحتاج إلى جيش من المحللين النفسيين لمعرفة أسرار العقد التي تدفع لكل هذه المجازر.. وكل هذا الخوف الدفين الذي يحرك هذا الحقد.. والتسامي..

لقد ذكرني أمس بالمملوك دقاق الذي حكم دمشق.. (دمشق العروبة) عقدا بشكله وبكل تفاصيل عصره..

ولذلك أصبحت قطر وغيرها تشعر أنها متقدمة على مملوكيتنا بمئات السنين وأن من حقها أن تقدم النصح والمشورة..

وذكرني بقول الشاعر أيضا:

وضع الحرب بغير مكان الحرب

 وحين الحرب تقلد سيفين من الخشب

وهي نفس القصيدة التي قال فيها:

ستتابعك الأجهزة الأمنية إياها

 بمسجلة وضمير خرب

مكلوبون، وحتى في النوم يعضون من الكلب

هذا هو السوس

وإن لم يقضى عليه تسوس كل الوطن العربي

نحن نعرف أن معركتنا أكبر من سورية.. وأنها معركة الأحرار مع الطغاة في كل الوطن العربي والعالم.. ولذلك سنصرب بيد من حرير صرح فرعون -الذي بناه على الوهم - فنجعله دكا دكا

الحماية المحلية ومستقبل الثورة السورية

إيمللي صديق (يعني شلفني إيميل) وقال لي: فلقتنا بقصة الحماية الدولية.. احكي لنا بشي تاني بقى..

طيب ما قلنا أنه سكرنا  هالموضوع و جبر الله.. وفعلا اليوم كنت ناوي احكي بالحماية المحلية

بظن إنكم صرتو مقتنعين معي انه الحماية الدولية إلها تمن، ويمكن يكون تمن غالي، والمشكلة بسورية -على عكس اللي صار بليبيا- بإنه التمن مو معروف شو هو بالضبط، مشان هيك ما عم يصير توافق متل اللي صار هنيك لإنه كان معروف إنه جزء من النفط هو التمن ومعروف أكتر إنه القذافي كان شافطه كله،فإذا إجى حدى أخد جزء وترك جزء أربح.. وكان في قناعة كاملة إنه ما في قدرة على مواجهة النظام بدون تدخل خارجي، فالمعادلة كانت بمجهول واحد وانحلت بسهولة.

ما قلنا خلصنا من قصة الحماية الدولية، وبدنا نحكي بالحماية المحلية!!

بس يمكن يطلع لنا حدى يقول لنا: إنه الحماية المحلية إلها تمن كمان!!!

وأنا باعتقد: أنه معه حق كمان، مثلا: هدا الجيش المصري العظيم، حدى بيقدر يقول: أنه مو هو اللي حمى الثورة؟ طبعا بغض النظر عن أسلوب أداءه أثناء وبعد الثورة المصرية المستمرة.. فهدا ما بيغير هالحقيقة

طيب هلق الجيش المصري مو عم يطالب – بشكل معلن أو غير معلن – بتمن لموقفه، كمان بغض النظر عن الدوافع الأخلاقية والوطنية.. وكل المثاليات اللي ما إلها مكان محرز بمجال السياسة، بالأخص ما يتعلق بالمستوى الأعلى فيها (وهو السلطة)، وهدا التمن بحده الاعلى إنه يفرض حاله كمؤسسة فوق تقلبات السياسة.. وفوق القانون وحتى فوق القضاء.. أو الاحتفاظ بالسلطة (الفعلية) كليا.. وبحده الادنى أنه يحتفظ بجزء منها أو يحافظ على مميزات وامتيازات خاصة.

وما بعرف أنا ليش البعض مستغرب من هالشي ؟! ما هي طبيعة الاشياء بمجال السياسة

حتى بليبيا نفسها، هي ثوار مصراتا اللي قلبوا المعادلة اللي كان عم يخطط لها الناتو بمرحلة من المراحل، وهي إنهم يقتلوا القذافي أو يزيحوه ويساووا تسوية لو على حساب وحدة ليبيا.. فليش مستغربين إنهم كانوا عم يطالبوا بمناصب سيادية منها رئاسة الوزراء، أو إنهم يعترضوا على رئيس أركان أو قيادات همة مو موافقين عليهم!!!

ما هو اللي بيقدم حماية أو بيتحمل تضحيات مشان التغيير لازم رح يجي اليوم اللي يمد إيده ويطلب تمن للشي اللي ساواه.

منرجع لسورية اللي هي همنا واهتمامنا

مين اللي عم يقدم الحماية المحلية هلق؟؟

أكيد انه الجيش الحر إله دور مهم بهالمعادلة بالوضع الحالي.. وأكيد انه كل واحد من الشجعان اللي قرروا الانشقاق، وتحملوا المخاطرة بسلامتهم الشخصية وسلامة عائلاتهم وممتلكاتهم، أكيد بيستحقوا أكتر من الاعتزاز والتقدير..

وليش هالمثالية الزايدة ( والأبو خريون) من بعض الأطراف اتجاه هالموضوع ؟!!

والناشطين اللي عم يضحوا في سبيل تنسيق الحراك الشعبي وتطويره.. والتصوير والتوثيق اللي عم يتم على الارض بمخاطرة عالية، لازم يكون إلهم دور، ودور مهم بمستقبل سورية.. بغض النظر أنه ما عندهم تاريخ نضالي سابق أو عمق فكري أو وعي ايديولوجي أو أي شي من هالحكي..

قلت لكم سابقا: إنه كل الثورات بتاريخ العالم ما عندها مثاليات بالحد الأدنى، وبالحد الأعلى بتكون مجنونة، وبتحول بعض المناضلين بلحظات لخونة أو متقاعسين، وبتحول بعض الزعران أو الناس العاديين لأبطال بين ليلة وضحاها (وهدا مو اتهام او استنتاج عبقري، هي طبيعة الأشياء اللي مو الكل بيقدر يستوعبها لإنها خارجة عن التفكير النمطي)

وكل الثورات بتاريخ العالم بتنصب المقاصل (الجسدية أو السياسية).. فليش مستغربين!!

أنا حقيقة اللي مستغرب من بعض المعارضين والمثقفين اللي عم يحاولوا يتوهموا البرود وسط نيران الثورة.. أو عم يحاولوا يحطوا العقل بوجه طوفان الجنون..

وأنا مستغرب أكتر من طبقات التجار والصناعيين بحلب ودمشق.. إذا مو شايفين اللي عم يصير!! أو مو مدركين أنه الأمور انحسمت بسورية.. وإنه النظام سقط فعليا، وبس ضل نقطتين ما انحسموا وهمة الوقت اللازم لإعلان هالشي، والكلفة المادية والبشرية ليتحقق على الأرض.

ورح كون مستغرب أكتر إذا همة متوهمين انه اللي عم يدفع الفاتورة هلق لازم يكون ما بده شي مقابلها، وإذا متوهمين إنه إذا استمروا أكتر بموقفهم هدا ما رح تكون خسائرهم أكبر بكتير، و انه ما عاد فيه مجال تبقى دمشق وحلب مستأثرة بالقسم الأكبر من خيرات البلد على حساب المدن والمحافظات اللي صنعت الثورة وحمتها وضحت مشانها بالغالي والرخيص!!

بس لهلق الفرصة ما انعدمت لسى.. وأنا على يقين انه أكبر حماية محلية ممكن تتقدم للثورة هلق هي تحرك هي الطبقات والمدن اللي لسى ما استوعبت الوضع.. ولو ما بادرت بتقديم هالحماية والاشتراك الفعلي بالثورة.. رح يجي مين يقدمها ويحصد نتائجها.. فالطبيعة ما بتعرف الفراغ.. والسياسة ما بتعترف إلا بالقوة على الأرض..

اصحوا وصحصحوا بقى طلع الفجر وبين الخيط الأبيض من الخيط الأسود

بس يحرق أخت أبر الهيروئين اللي عم توزعها قناة الدنيا وأخواتها

العقل والجنان في الثورة السورية 4

كإنه إمبارح قبل ما نام كنا عم نحكي بموضوع الحماية الدولية، مو هيك؟؟

على كل هي آخر مرة رح إحكي فيها بهالموضوع وبعدها إنتو أحرار (وما أنا إلا من غزية..)

باختصار – وتكملة للي قلناه إمبارح – إذا كانت المطالبة بالحماية الدولية لعبة عم نلعبها فهدا قمة العقل.. أما إذا كنا مصدقينها فهدا قمة الجنان

وما بخبي عنكم إمبارح لما نمت فوق الورق شفت بنومي أنه هي لعبة عم يلعبوها الثوار وهمة مو قابضينها بفرنك.. بالأخص بحمص –اللي منها أقوى الدعوات- لإنه الحماصنة مو بس جننوا النظام!! لاء جننونا معه كمان.. يعني أنا ما عدت عارف مزحهم من جدهم.. يعني طلعوا يهتفوا ضد المحافظ، ولما قاموا لهم إياه، صار بدهم إسقاط النظام.. ولما سقط النظام صار بدهم إعدام الرئيس.. وعلمك كنا عم نلعب بالفتيش وقاذف البطاطا والبصل.. وعم نتمسخر علمك قلبت جد.. وجد الجد كمان.. وبنفس الوقت ما عم أعرف ميز عندهم الجنازة من العرس من المظاهرة.. شي بيجنن

ولما كانت حمص تقريبا لحالها بالميدان بعد حصار درعا وريف الشام وكان عند العرب والغرب شكوك من استمرار الثورة ما طالبوا بالحماية الدولية!!! وهلق لما الثورة تجذرت بأربع خمس محافظات عالأقل والباقي رجله بلشت تأخد عالشارع، ولما عاد فيه شك لا بالشرق ولا بالغرب من انه الثورة مستمرة والنظام ساقط صاروا مصرين على الحماية الدولية.. إيه والله رح يشككوني باللي عم شوفه واسمعه، ليكون عن جد كله فبركات عم تصير بالدوحة!!

يعني أنا ما بظن أنه الحماصنة بالذات لحقوا ينسوا أنه حلف الناتو بليبيا ترك الناس بمصراتا شهر كامل تحت قصف صواريخ الغراد والمدفعية سقط فيها اكتر من ست ألاف شهيد لغاية في نفس يعقوب (مع إنه كان معه تفويض كامل بحماية المدنيين وقابض تمنها عالمضمون)

وما بظن نسوا في 1991 لما الأمريكان والتحالف غضوا النظر عن طيران صدام بالمناطق الممنوعة مع إنه كان في قرار واضح من الأمم المتحدة تحت الفصل السابع.

(ورح قول لكم شغلة برى الموضوع: -بس تذكروها من هالمنون- لو صار وساووا مناطق آمنة بسورية احتمال تصير أخطر مناطق فاحذروها)

وبالسودان شو ساوت مذكرة توقيف البشير ورفاقه وتحويلهم لمحكمة الجنايات؟! وقفت القتل؟ حمت المدنيين؟ والغرب عاملوا إياها فزاعة كلما قال لاء بيرفعوا له إياها وكل ما هو ماشي على الصراط غير المستقيم بيغضوا النظر عنه.. بس المذكرة قائمة.. وعيش يا حشيش لينبت الكديش.. (لك شو حشيش ما حشيش)

خلينا نصحصح الله يرضى عليكم.. يعني أنا اللي  الله مورجيني إياه: أنه الحماية الدولية وحقوق الإنسان والمسؤولية الأخلاقية للمجتمع الدولي ومحكمة الجنايات.. كلها شغلات حلوة وصحيحة بس الإخراج سيء (مسروق من بليد)

طبعا قلت لكم أنا ما ضد أنه نلعب اللعبة – حتى لازم نلعبها صح- بس أصحى ثم أصحى أنه نصدقها!!! هون الجنان!!!

يا ربعي أنا قلت كل اللي معي.. وبعرف إني كترت اللعي.. وبقول لكم وأنا بكامل الوعي: إني معكم لو ما كنتوا معي.. وإذا بدكم تجنوا، أنا أبو الجنان كله يا بني ربعي

وأنا مع أي جنان إذا كان فيه عقل قادر بالآخر يلمه أو يضبطه

وأنا ضد كل عقل أو وعي إذا ما عنده شوية جنان تقدر تحركه

وخلص انتهينا من الموضوع.. سكرنا وجبر الله

ويلعن أخت هالحشيش اللي توزع لنا إياه الجزيرة.. شكله مضروب وفوتنا بالحيط

العقل والجنان في الثورة السورية 3

امس كانت جمعة مثالية للشرح الفكرة اللي قلتها بالجزء السابق من اختلاط العقل بالجنان بهالثورة العتيدة، فمن حيث المظاهرات كانت كبيرة وجيدة، بس اسم الجمعة (ان تنصروا الله ينصركم، والحماية الدولية مطلبنا) بيمثل قمة التناقض اللي ما ممكن يقبله عقل!! مشان هيك، فيه ناس حذفوا النُص الأول منها وناس حذفوا النُص التاني وهدا شي ممكن نتفهموا بس اللي تركوها متل ما هي فهدا هو الجنان بعينه!!

على كل قلت -من بداية هالمقال- أنه أنا مع الثورة بكل جنانها وعقلها.. يمكن لإنها بتشبهني، أنا كمان مزيج من الجنان والعقل!! ومليان تناقضات لدرجة إني كنت مخطط ابدى هالجزء بكلمات مباركة من كتاب الله (ع) وكلمات للشيطان

الاولى: (يا قومي أرأيتم إن كنت على بينة من ربي ورزقني منه رزقا حسنا وما أريد أن أخالفكم لما انهاكم عنه، إن أريد إلا الإصلاح ما استطعت وما توفيقي إلا بالله عليه توكلت وإليه أنيب) صدق الله العظيم

الثانية: ..الأمم المتحدة لم تنفذ أي من قراراتها بخصوص الشرق الأوسط.. إنها لا تتمتع بأية مصداقية في المنطقة.. إنها لعبة نلعبها ولا يعني أننا نصدقها..

هدا كلام صحيح مية بالمية بس أنه يقوله رئيس جمهورية بمقابلة علنية هو الغلط مية بالمية.. (طبعا هدا مو نوبة منحبكجية مفاجئة).. أنا قصدي إنه حتى الشيطان بمعظم الأحيان ما بيقول الأشياء الغلط بس هو بيوظف الأقوال في سبيل الفساد في الأرض

ما بعرف هالمقدمة قربتنا من الشي اللي كنا عم نحكي فيه ولا بعدتنا ونستنا!!

أنا لسى ما ضعت ولا ضوعت واللي بدي قوله على بلاطة هيك: أنه ما نصدق الكذبة اللي كذبناها – او كذبوها علينا- عن الحماية الدولية.. ونرجع للعقل شوية (طبعا مع استمرار جنان الثورة)

لإنه –برأيي- الحماية الدولية نزغ من عمل الشيطان.. بتبين حلوة ولذيذة متل ما الشيطان بيصور لنا الخطيئة بس آخرتها وخيمة..

والله متت من النعس منكمل بكرة (يتبع)

العقل والجنان في الثورة السورية

العقل والجنان في الثورة السورية (1)

زمان قالوا الثورة بيخطط لها الأذكياء وبينفذها الشجعان وبيورثها الجبناء.. وأخواننا المصرين غيروها مؤخرا لتكون الثورة بيخطط لها الشبان وبينفذها الشجعان وبيورثها العسكر والإخوان

بس الثورة السورية لا حدى خطط لها ولا حدى اتوقعها!! ولا بأظن أن أي حساب عقلي كان رح يوصل إنها ممكنة.. وصدق فيها المتل الشعبي: (ساعة جنان أحسن من خمسين سنة عقل)

يعني وقتها كنا بحاجة للجنان.. وما بخبي عنكم إني اخترت اسم جحا قبل الثورة بشوية لأكتب شي فيه جنان و تحريض على الجنان.. لإني حسيت انه الثورة بحاجة لمجنون واحد على الأقل.. وما كنت عارف أنه البلد رح تتعبى مجانين وانه رح يصير طوفان من الجنان.. وصل لمستوى أنه تهتف كتير مناطق: (يا برهان إذا مو سمعان.. الشعب بده قصف طيران..)

وبوسط كل الجنان صرت عم حس حالي عاقل غصب عني ويمكن صارت كتاباتي غليظة غصب عني، وما بعرف إذابكون عم اظلم البلد لو قلت هلق أنه الثورة بحاجة لعاقل واحد على الأقل (أكيد مو أنا)

العقل والجنان في الثورة السورية 2

حتى ما نظلم حالنا لازم نقول بالبداية أنه الثورة السورية أثبتت أنها أعظم ثورة بالتاريخ المعاصر من حيث اللي واجهته من قمع وقسوة من النظام ومن تقاعس دولي وإقليمي، وكل اللي بينحكى عن قمع نظام الشاه أو ماركوس.. صار لعب أولاد قدام اللي شفناه من هدا النظام.. وهي القناعة ما لازم تزعزع بكل اللي رح نقوله لاحقا

أكيد أنه الثورات -كل الثورات- ما كانت جميلة متل ما منشوفها بالكتب اللي بتنقيها بعدين وبتبروزها وبتحطها بفترينا بمتحف التاريخ لتصير للعرض فقط.. بس لو نرجع ونشوف بعض الكتب أو الجرائد اللي رصدت تفاصيلها الصغيرة أو مراحلها المختلفة وخلافتها اللي تحت السطح أو فوق السطح.. منعرف أنه ما فيه ولا ثورة خليت من الجنان!! ويمكن الثورة الفرنسية صنفت كأعظم ثورة بالتاريخ لإنها اكتر ثورة فيها جنان بالتاريخ، وصلت لحد أنها قتلت ناس من أهم القادة والمفكرين من أمثال روبسبير وغيرهم، ونصبت المقاصل خبط عشواء.. فمو كتير على الثورة السورية إنها تهاجم هيثم مناع وبرهان غليون وحسن عبد العظيم.. وميشل كيلو!!

يعني أنا شايف إنه بعض الأمور عادية ومو شاذة عن الثورات السابقة.. وبنفس الوقت هي مليانة بالجنان والعقل بوقت واحد

فلولا العقل لكانت  البلد راحت لحرب أهلية أو طائفية لإنه النظام ما ترك وسيلة لدفعها بهدا الاتجاه..

ولولا الجنان لكانت الاحتجاجات ضلت محصورة بدرعا أو حوران والنظام حاول المستحيل لحصرها، وصابه جنان حقيقي لما لاقى إنها انتقلت لعدة مناطق كانت مفاجأتها بانياس

ولولا العقل ما اتأخرت حماة عن الاشتراك بالثورة اكتر من شهرين!! ولولا الجنان ما اتجذرت الثورة بحمص وصارت عاصمتها

لولا العقل ما إجت دعوات السلمية من مناطق ريفية.. ولولا الجنان ما إجت دعوات أو محاولت استخدام السلاح من بعض المدن!!

مع هيك كل هدا بالنسبة إلي مفهوم، بس في نقطة جنان واحدة هي اللي ما عم اقدر إفهمها، وهي اصرار البعض على طلب التدخل الدولي!!

يعني ببداية الثورة يمكن كانت مبررة اكتر لإنه ما حدى كان واثق انه الثورة ممكن تستمر بدون حماية دولية، وما حدى كان متوقع أبدا أنه الخسائر ممكن تكون قليلة بهدا الشكل!! (طبعا بتمنى هون لحظة عقل لحتى ما حدى يقول إني عم استهتر بالدم السوري او تضحيات الناس اللي عالأرض) بس بصراحة لو أنه الشعب السوري عارف أنه الثورة رح تكلف بس خمس او ست ألاف شهيد أو عشرة ما كان سكت على هدا النظام أربعين سنة

بس بلحظة جنان قرر الشعب السوري يثور واتحدى أي واحد كان متوقع وقتها أنه الخسائر رح تكون أقل من عشرات الآلاف.. ومع هيك الشعب قبل التحدي وكان قدها.. وخاض معركة من أذكى وأشرس المعارك بالتاريخ وقدر يسقط النظام بأقل بكتير من الخسائر اللي كانت متوقعة وبدون أية مساعدة تذكر

أنا عم قول وأنا بكامل قواي الجنانية أنه الشعب السوري فعليا أسقط النظام والموضوع هلق بس مجرد وقت.. وأنا عارف أنه هدا الوقت بيجوز يطول أو يقصر حسب الظروف.. وأنه الوقت بالنسبة للشعب السوري هو كلفة بشرية مؤلمة وكلفة اقتصادية مو سهلة كمان

بس التدخل الدولي أو الحماية الدولية هلق ما عادت رح تحقق لنا شي يذكر مقابل الشي اللي بدها تأخده يعني هي يمكن تقصر المدة شوية (وأنا أشك أنها رح تقلل الكلفة البشرية والاقتصادية) واللي رح تطلبه شي مو معروف بالنسبة إلنا لنعرف إذا الموضوع بيستاهل

يعني قمة الجنان هلق انه نطلب تدخل أي طرف خارجي ليجي يلملم المغانم بعد ما الشعب السوري بنفسه ساوى المعجزة ودفع تمنها من دمه ودمعه وماله

والجنان الأكتر أنه نفس الناس اللي حطموا أسطورة هدا النظام ودفعوا القسم الأكبر من الفاتورة هم نفسهم اللي عم يطلبوا التدخل الخارجي ومفكرين أنه هدا بمصلحتهم!!!

فإما همة مو قادرين يشوفوا اللي قدروا يعمله نتيجة الضغط اللي فارضه النظام عليهم، أو أنا ما عم أفهمهم أو فيه طرف مندس بيننا (طرف جنان)

يتبع..

في طنجرة البوخار

لاحظت لما قرأت مذكرات كسينجر بالأخص وبقية الكتب الأمريكية اللي تناولت صناعة القرار السياسي في امريكا متل "لعبة الأمم، حبال من رمل، مذكرات نيكسون.." أنهم كلهم تقريبا بيركزوا كتيرعلى نقطة مهمة جدا ولو أنها ممكن تبدو سخيفة بالأخص للقارئ العربي ويمكن يمر من فوقها مرور اللئام

وهي النقطة اللي لفتت نظري - وأنا باعتبرها مهمة إلنا بالأخص بهالمرحلة- هي تركيزهم وبالتفصيل الممل على ساعات اتخاذ القرار بالأخص في الأزمات الكبرى متل أزمة الصواريخ الروسية في كوبا.. وقرار إنهاء حرب فيتنام.. إعادة العلاقات مع الصين وغيرها.. فبتتواتر الرويات عنهم عن متخذ القرار (الرئيس) في الساعات الأخيرة قبل اتخاذ القرار أنه كان بحالة "ريلاكس" استرخاء تام!! فمرة بيذكروا أنه كان عم يلعب البلياردو.. ومرة بيقولوا كان عم يتمشى بمنتجع كامب ديفيد.. أو عم يتسبح عالبحر.. او عم يتشمس عالشط.. يعني شي ما بسهولة ممكن يفوت بمخنا نحن العرب!!

بس كمان لما منقرأ عن إدارة الأزمات منلاقي أنه أهم شي لازم يكون متوافر باللي بدو يدير الأزمة أنه ما يكون منفعل بها او غارق بتفاصيلها لدرجة ما تخليه يشوف المخارج او يقدر يرسم الاستراتيجيات لحلها..

بس كمان، ومشان ما نفهم الموضوع غلط، هي الكتب بتعطي تفصيل لكيفية دراسة القرار و مجهود فرق العمل والرئيس فيها.. فاتخاذ القرار بيمر بمراحل أولها جمع المعلومات وهدا بيتم عن طريق جهتين هما السي أي أيه عن طريق عملاءها ووزارة الخارجية عن طريق سفارتها.. بعدها بيتم تحليل المعلومات ومقاطعتها للوصول لأقرب صورة للواقع وهدا بيساويه فريق العمل المكلف بالملف.. بعدها بيتم دراسة كل الاحتمالات بضوء المعلومات المتوفرة وكل البدائل وهون بيدخل جهاز مستشار الأمن القومي والبيت الأبيض.. وبيتم مناقشتها باجتماعات مكثفة بيستعنوا فيها بجهات مختلفة حسب طبيعة الأزمة (البنتغون، المالية، إف بي أي..)

بس وقت بيكتمل هدا الشغل وبيصير الوقت اللي لازم الرئيس ياخد قراره النهائي بينسحب من المعمعة وبيروح مكان بعيد عن الضغط بياخد ريلاكس ليقرر

هلق ليش اتذكرت وذكرت كل هالتفاصيل المملة؟؟

بصراحة لأني حاسس بالفرق الهائل بين الشي اللي بيتوفر لصناع القرار عندهم وعندنا بالأخص بهالمرحلة اللي عم تمر فيها سورية بأعقد و أصعب أزمة في العالم، وهي مخلية صناع القرار بالغرب مع كل أجهزتهم ومخابراتهم وخبراءهم بحالة حيرة وتخبط، وهمة قاعدين برى الدوامة

أما الناس اللي مفروض إنهم يديروا الأزمة من القيادات السورية واللي مطلوب منهم يتخذوا قرارات من أصعب القرارات بتاريخ أي سياسي سواء من قيادات المجلس الوطني أو من هيئة التنسيق الوطنية أو من قيادات الحراك الثوري على الأرض فهمة كلهم محطوطين بجو متل كأنهم بطنجرة البخار اللي ممكن تنفجر بأي لحظة.. ومطلوب قرار قبل فوات الآوان وجرس الإنذار عم يرن

ضغوط من النظام ضغوط من الشارع ومن واقع متسارع.. ضغوط من العرب ضغوط من الغرب ودول الجوار.. وكل هدا مفهوم لسى بس اللي مو مفهوم هو الضغوط اللي عم تمارسها على بعضها البعض.. فشلون بده يطلع القرار بهدا الجو؟!!

وبين هالضغوط الأطراف التلاتة مو قادرة تشوف أنه كل واحد في بإيدوه جزء من الحل.. الشارع بإيده التفويض الشعبي بس ما فيه جهة سياسية بتتعامل مع شارع.. وهيئة التنسيق عندها طرح سياسي ناضج بس ما عندها تمثيل أو تواصل مع الشارع اللي ما ملاقي وقت ليفهم تخوفاتها وحساباتها السياسية إضافة لإنه معظمهم على المعاش.. اما المجلس الوطني عنده دماء جديدة وعنده تواصل أكتر مع الشارع  بس توليفة مو متجانسة وطروحاته ملتبسة وكل مين عم يغني بواد وأسوأ ما فيه أنه عامل على مبدأ ما يطلبه الجمهور وبدل ما يسعى لتوجيه وقيادة الشارع عم يصرخ ليل نهار نحن صدى

أنا رغم كل هاد ما قادر لوم حدى منهم، وشايف أنه كل منهم عم يحاول يساوي أحسن ما عنده بس هو تحت ضغط هائل فالشارع تحت ضغط القمع الوحشي للنظام ونتيجة ألعاب النظام أسلوبه القديم التشكيكي مخليهم متوترين وفاقدين الثقة اللازمة بأي قيادة وخايفين من الركوب على تضحياتهم.. وهيئة التنسيق تحت ضغط تاريخهم النضالي والإيديولوجيات القديمة المتكلسة والهواجس اتجاه الغرب ومعارضة الخارج واللاعبين الجدد.. والمجلس الوطني تحت ضغط تناقضات تركيبته وضغط التهجير القسري.. والرغبة بخدمة الثورة بأي شكل وضعف الخبرة السياسية..

وإضافة لكل هدا فيه تحريض إعلامي رهيب على الأطراف التلاتة مخلي أي تصرف أو تصريح متل برميل البارود.. والسياسة ما ممكن تكون بهدا الشكل بالأخص بحالة أزمة

برجع من مكان ما بديت – وأنا عارف أنه اللي رح قوله صعب بالواقع الحالي- نحن بحاجة لريلاكس – سياسي طبعا – يعني نخفف هدا التوتر للحد الأدنى ونتطلع للصورة الأشمل.. ولازم نقتنع أن ما حدى رح يقدر يتجاهل تضحيات الناس على الأرض لإنها موثقة.. ولا حدى يخاف على تاريخه لإنه بعد ما تهدى الأمور كل شي محفوظ.. وما نحمل حالنا مسؤولية اكتر من اللازم اتجاه التدخل الدولي لإنه إذا بده يصير فما رح يكون لإنه نحن طلبناه رح يصير لإنه مصالح الغرب بتقتضيه.. ولازم يكون عندنا القناعة الكاملة أنه الشباب اللي عم يطالبوا بالتدخل الغربي هلق همة حيكونوا أول مقاتلين ضده إذا تجاوز على السيادة او الكرامة السورية

ولا حدى يخاف انه ما يلاقي  إله مكان بسورية الديمقراطية بالأخص من المهجرين لأنه البلد بيوسع الكل وبالعكس أنا بتوقع أنه رح يكون عندنا نقص بالكوادر السياسية والتكنولوجية مو فائض بالأخص بمرحلة إعادة بناء الدولة

واعذروني على الإطالة والبرود، فالبرود جنون.. وجحا مجنون الثورة، وبيحق له يقول اللي بده اياه بدون مؤاخذة.. سامحونا  

  

مطر يا غياث مطر

طلب مني صديق عزيز أن أعيد نشر قصيدة غياث في اليوم الأول من العام الجديد لأنها قصيدة وداع لغياث الأب - رحمه الله- وتفاؤول بميلاد غياث الابن - حفظه الله -  مثل لحظة الانتقال من عام مضى  وطوى الألم إلى عام جديد يحمل الأمل

يفتح غياث عينيه قليلا

يبهره النور

يغمض غياث عينيه طويلا

يغمره الصمت

يحرك ذراعية الغضتين

يرسم في الفراغ كلمات غير مفهومة

يسكن غياث في بوتقته الصغيرة

يخجل من كثرة العيون التي تراقبه

يسكن تعبا.. مدهوشا

يستعجل غياث  في الرحيل

ويتأخر غياث عن موعد الوصول

يخجل من كثرة العيون التي ترقبه

يأتي على مهل كعادته

لا يلوح للمنتظرين مثل الأبطال

ويبكي.. يصرخ.. مثل الأطفال

يسكن غياث في اللحد مثل الرجال

ويغمض عينيه طويلا

يسكن غياث في المهد مثل الأطفال

ويفتح عينيه طويلا

يغمره النور.. ونظرات ملهوفة

تحدق فيه طويلا

تتأمل قسماته غير المفهومة

يسمع تكبيرات.. لا يبصر قائلها

تنفرج الشفتان قليلا

وشُبه لهم.. طيف ابتسامة غير مفهومة

فيسكن في المهد قليلا

تتسمر نحوه العيون.. بنظرات مهمومة

يصرخ غياث.. يبكي منزعجا

خذوه فأرضعوه..

يسكن في المهد قليلا

يصرخ غياث.. يبكي ثانية..

خذوه فغسلوه

................

يبكي.. يصرخ من جديد

خذوه فغيروا ملابسه

.................

يبكي.. يصرخ

خذوه..

ماذا تريد يا غياث؟؟!

خذوه.. خذوه

اعطوه.. اعطوه

ماذا يريد فأعطوه

يصرخ.. يصرخ..

ماذا يريد من كان في المهد صبيا

لا أحد يفهم

أن غياث يريد: مطرا.. وحرية

مطرا.. وحرية